ഒരു സമൂഹത്തിന്റെ വലിയത്വം കെട്ടിടങ്ങളുടെ ഉയരത്തിലോ പണത്തിന്റെ വളർച്ചയിലോ അല്ല. ഏറ്റവും ബലഹീനനായ മനുഷ്യനോട് അത് എങ്ങനെ പെരുമാറുന്നു എന്നതിലാണ്.
കാസർഗോഡിൽ അടുത്തിടെ നടന്ന ഒരു സംഭവം ഇത് വീണ്ടും ഓർമ്മിപ്പിച്ചു.
ജീവിതത്തിന്റെ അവസാനം ഒറ്റയ്ക്കായി യാത്ര അവസാനിപ്പിച്ച ഒരു വയോധികൻ. മരണശേഷവും അദ്ദേഹത്തിന്റെ മൃതദേഹം ഏറ്റെടുക്കാൻ കുടുംബത്തിന് കഴിഞ്ഞില്ല. അപ്പോൾ എല്ലാ നിയമനടപടികളും പൂർത്തിയാക്കി, അദ്ദേഹത്തിന് സ്വന്തം മതാചാരപ്രകാരം അന്ത്യകർമ്മങ്ങൾ ഒരുക്കിയത് ഒരു ജനപ്രതിനിധിയായിരുന്നു. മുസ്ലിം വനിതയായ ഇർഫാന ഇഖ്ബാലും ഒപ്പമുണ്ടായിരുന്ന സാമൂഹിക പ്രവർത്തകരും ചേർന്നാണ് ഈ ദൗത്യം പൂർത്തിയാക്കിയത്.
ഇവിടെ പ്രധാനപ്പെട്ടത് ആരുടെ മതമാണെന്നോ ആരുടെ രാഷ്ട്രീയം ജയിച്ചുവെന്നോ അല്ല. ഒരു മനുഷ്യന്റെ അവസാന യാത്ര മാന്യമായി പൂർത്തിയാകണം എന്ന കരുണയാണ് ഇവിടെ ജയിച്ചത്.
മതങ്ങൾ മനുഷ്യനെ നന്മ പഠിപ്പിക്കാനാണ്. രാഷ്ട്രീയം ജനങ്ങൾക്ക് സേവനം ചെയ്യാനാണ്. പക്ഷേ മനുഷ്യസ്നേഹം ഇല്ലെങ്കിൽ ഇവ രണ്ടും അർഥമില്ലാത്തതാകും.
ജീവിച്ചിരിക്കുമ്പോൾ മനുഷ്യന് ഏറ്റവും വലിയ സമ്പത്ത് മറ്റുള്ളവരുടെ സ്നേഹമാണ്. മരണശേഷം ലഭിക്കുന്ന ഏറ്റവും വലിയ ബഹുമതി അന്തസ്സുള്ള യാത്രയാണ്. അത് ഉറപ്പാക്കാൻ മുന്നോട്ടുവന്നവർ സമൂഹത്തിന് വലിയ പാഠം നൽകി.
ഇന്ന് നമ്മൾ കൂടുതലായി സംസാരിക്കുന്നത് ജാതി, മതം, രാഷ്ട്രീയം എന്നിവയെക്കുറിച്ചാണ്. എന്നാൽ കൂടുതൽ സംസാരിക്കേണ്ടത് മനുഷ്യനെക്കുറിച്ചാണ്. വിശപ്പ് മതം ചോദിക്കില്ല; കണ്ണീർ രാഷ്ട്രീയം നോക്കില്ല; മരണം ജാതി തിരഞ്ഞെടുത്ത് വരികയുമില്ല.
മനുഷ്യനെ മനുഷ്യനായി കാണാൻ കഴിഞ്ഞാൽ മാത്രമേ നമ്മൾ സംസ്കാരമുള്ള സമൂഹമാണെന്ന് പറയാൻ കഴിയൂ. കരുണയുള്ള കൈ, ആശ്വാസം നൽകുന്ന വാക്ക്, പ്രതിസന്ധിയിൽ കൂടെയിരിക്കുന്ന മനസ്സ് -ഇവയാണ് മനുഷ്യന്റെ യഥാർത്ഥ തിരിച്ചറിയൽ.
കാസർഗോഡിലെ ഈ സംഭവം വലിയ ചരിത്രസംഭവമാകണമെന്നില്ല. പക്ഷേ മനുഷ്യഹൃദയങ്ങളിൽ നിലനിൽക്കേണ്ട ഒരു ഓർമ്മയാണിത്. ഇവിടെ ജയിച്ചത് ഒരു വിഭാഗമല്ല; ഒരു മതമല്ല; ഒരു രാഷ്ട്രീയവുമല്ല.
ജയിച്ചത് മനുഷ്യത്വമാണ്.
നമ്മുടെ കുട്ടികൾക്ക് നൽകേണ്ട ഏറ്റവും വലിയ പാഠവും ഇതുതന്നെയാണ് -മനുഷ്യനെ അവന്റെ പേര്, മതം, ആശയം എന്നിവകൊണ്ട് അളക്കരുത്. അവനും നമ്മളെപ്പോലെ വേദനിക്കുന്ന, സ്നേഹിക്കുന്ന, കരയുന്ന ഒരു മനുഷ്യനാണെന്ന് തിരിച്ചറിയണം.
മനുഷ്യത്വം ജീവിക്കുന്നിടത്താണ് യഥാർത്ഥ ദൈവികത. മനുഷ്യൻ മനുഷ്യനോട് ചേർന്നുനിൽക്കുന്നിടത്താണ് പ്രത്യാശയുടെ പുതിയ ലോകം പിറക്കുന്നത്.
ഡിജിറ്റൽ പ്രസ്സ് ക്ലബ് ഓഫ് ഇന്ത്യയുടെ GCC രാജ്യങ്ങളുടെ ഇൻചാർജ് ആണ് ശ്രീ. ബഷീർ വടകര.
