തിരുവനന്തപുരം: റെയിൽ യാത്രക്കാരുടെ ടിക്കറ്റ് പരിശോധന കൂടുതൽ കർശനമാക്കാൻ ഇന്ത്യൻ റെയിൽവേ. ഒക്ടോബർ 1 മുതൽ 31 വരെ പ്രത്യേക ടിക്കറ്റ് പരിശോധനാ യജ്ഞം നടത്തുന്നതിന്റെ ഭാഗമായി ടിക്കറ്റിന്റെ സാധുതയും യാത്രക്കാരുടെ തിരിച്ചറിയൽ രേഖകളും കൂടുതൽ വിശദമായി പരിശോധിക്കും. ഉത്സവകാലത്തെ യാത്രത്തിരക്ക് വർധിക്കുന്ന സാഹചര്യത്തിലാണ് പരിശോധന ശക്തമാക്കുന്നത്.
പ്രത്യേക ക്വോട്ടയിൽ ബുക്ക് ചെയ്ത ടിക്കറ്റുകൾ, നിരക്കിളവ് ലഭിക്കുന്ന ടിക്കറ്റുകൾ, റെയിൽവേ പാസുകൾ, ഗ്രൂപ്പ് ബുക്കിങ്ങുകൾ എന്നിവയ്ക്കാണ് പരിശോധനയിൽ പ്രത്യേക ശ്രദ്ധ നൽകുന്നത്. ടിക്കറ്റിന്റെ യഥാർത്ഥ ഉടമ തന്നെയാണോ യാത്ര ചെയ്യുന്നതെന്നും ലഭിച്ചിരിക്കുന്ന ഇളവിനോ ക്വോട്ടയ്ക്കോ യാത്രക്കാരന് അർഹതയുണ്ടോ എന്നതും പരിശോധിക്കും.
ഒറിജിനൽ തിരിച്ചറിയൽ രേഖ കൈവശം വേണം
ഇളവ് ലഭിക്കുന്ന ടിക്കറ്റുകളിലോ പ്രത്യേക ക്വോട്ടയിലോ യാത്ര ചെയ്യുന്നവർ നിർദേശിച്ച ഒറിജിനൽ തിരിച്ചറിയൽ രേഖ യാത്രയ്ക്കിടെ കൈവശം കരുതണമെന്ന് റെയിൽവേ അറിയിച്ചു.
ഒരേ ടിക്കറ്റിൽ ഒന്നിലധികം യാത്രക്കാരുണ്ടെങ്കിൽ, ടിക്കറ്റിൽ ഉൾപ്പെട്ടിരിക്കുന്ന കുറഞ്ഞത് ഒരാൾ എങ്കിലും നിർദേശിച്ച ഒറിജിനൽ തിരിച്ചറിയൽ രേഖ കൈവശം വയ്ക്കണം. ആവശ്യമായ ഒറിജിനൽ രേഖ ഹാജരാക്കാൻ കഴിയാത്ത സാഹചര്യത്തിൽ ടിക്കറ്റിലുള്ള യാത്രക്കാരെ സാധുവായ ടിക്കറ്റില്ലാതെ യാത്ര ചെയ്യുന്നവരായി കണക്കാക്കാൻ സാധ്യതയുണ്ടെന്ന് റെയിൽവേ അധികൃതർ വ്യക്തമാക്കിയിട്ടുണ്ട്.
റെയിൽവേയുടെ E-Pass, Privilege Ticket Order (PTO) എന്നിവ ഉപയോഗിച്ച് യാത്ര ചെയ്യുന്നവർക്കും പ്രത്യേക പരിശോധനയുണ്ടാകും. നിർദേശിച്ച ഒറിജിനൽ തിരിച്ചറിയൽ രേഖ കൈവശം വയ്ക്കുന്നതിനൊപ്പം E-Pass/PTO യാത്രയ്ക്കുള്ള സാധുവായ അധികാര രേഖയായി യഥാവിധി കൈമാറ്റം ചെയ്തിട്ടുണ്ടെന്നും യാത്രക്കാർ ഉറപ്പാക്കണം.
റിസർവേഷൻ ടിക്കറ്റുകൾക്ക് പുറമെ അൺറിസർവ്ഡ് ടിക്കറ്റുകളുടെ യഥാർത്ഥതയും പരിശോധനാ സംഘം പരിശോധിക്കും. ടിക്കറ്റിന്റെ സാധുത ഉറപ്പാക്കുന്നതിനായി ആവശ്യമായ സാഹചര്യങ്ങളിൽ ടിക്കറ്റ് പരിശോധനാ ജീവനക്കാർ TTE App ഉപയോഗിച്ചും വിവരങ്ങൾ പരിശോധിച്ചേക്കും.
വരുമാന ചോർച്ച തടയുക ലക്ഷ്യം
റെയിൽവേയുടെ പ്രത്യേക പരിശോധനയ്ക്ക് നിരവധി ലക്ഷ്യങ്ങളുണ്ട്. റിസർവേഷൻ സൗകര്യങ്ങളുടെ ദുരുപയോഗം തടയുക, നിരക്കിളവുകളുടെ വ്യാജ ഉപയോഗം നിയന്ത്രിക്കുക, റെയിൽവേ പാസുകളുടെ ദുരുപയോഗം കണ്ടെത്തുക, വ്യാജമോ അസാധുവായതോ ആയ ടിക്കറ്റുകൾ കണ്ടെത്തുക, റെയിൽവേയുടെ വരുമാന ചോർച്ച തടയുക എന്നിവയാണ് പ്രധാന ലക്ഷ്യങ്ങൾ.
സാധുവായ ടിക്കറ്റോ യാത്രാനുമതിയോ ഇല്ലാതെ യാത്ര ചെയ്യുന്നവർക്കുള്ള കുറഞ്ഞ അധിക ചാർജിലും മാറ്റം വന്നിട്ടുണ്ട്. 2026 ജൂൺ 20 മുതൽ കുറഞ്ഞ അധിക ചാർജ് ₹250ൽ നിന്ന് ₹500 ആയി ഉയർത്തിയിട്ടുണ്ട്. റെയിൽവേ നിയമത്തിലെ ബന്ധപ്പെട്ട വ്യവസ്ഥകളിലാണ് മാറ്റം പ്രാബല്യത്തിൽ വന്നത്. സാധുവായ ടിക്കറ്റ് ഇല്ലാതെ യാത്ര ചെയ്യുന്നതിന് യാത്ര ചെയ്ത ദൂരത്തിനുള്ള നിരക്കിനൊപ്പം ബാധകമായ അധിക ചാർജും ഈടാക്കാം. തുക അടയ്ക്കാത്ത പക്ഷം നിയമാനുസൃത തുടർനടപടികൾക്കും സാധ്യതയുണ്ട്.
ഒക്ടോബർ 1 മുതൽ 31 വരെയുള്ള പ്രത്യേക പരിശോധനാ കാലയളവിൽ ടിക്കറ്റ് പരിശോധന ശക്തമാകുന്നതിനാൽ, കേരളത്തിൽ നിന്നുള്ള ട്രെയിൻ യാത്രക്കാരും റെയിൽവേയുടെ നിർദേശങ്ങൾ കൃത്യമായി പാലിക്കേണ്ട സാഹചര്യമാണുള്ളത്.
