കീവിൽ റഷ്യൻ വ്യോമാക്രമണം: 12 പേർ കൊല്ലപ്പെട്ടു

Badhra Lekshmi
3 Min Read

വ്യോമപ്രതിരോധ സംവിധാനങ്ങളുടെ ക്ഷാമം രൂക്ഷം

കീവ്: ഉക്രെയ്ൻ തലസ്ഥാനമായ കീവിൽ റഷ്യ നടത്തിയ ശക്തമായ വ്യോമാക്രമണത്തിൽ കുറഞ്ഞത് 12 പേർ കൊല്ലപ്പെടുകയും 34 പേർക്ക് പരിക്കേൽക്കുകയും ചെയ്തു. വ്യോമപ്രതിരോധ മിസൈലുകളുടെ കടുത്ത ക്ഷാമം നേരിടുന്നതിനിടെയാണ് കീവിനെ ലക്ഷ്യമിട്ട് റഷ്യ വീണ്ടും വ്യാപക ആക്രമണം നടത്തിയത്.

രാത്രിയിലുണ്ടായ ആക്രമണത്തിൽ നഗരത്തിന്റെ വിവിധ ഭാഗങ്ങളിലെ അപ്പാർട്ട്മെന്റ് കെട്ടിടങ്ങൾ, ഗോഡൗണുകൾ എന്നിവയ്ക്ക് കേടുപാടുകൾ സംഭവിച്ചതായി ഉക്രെയ്ൻ സ്റ്റേറ്റ് എമർജൻസി സർവീസ് (DSNS) അറിയിച്ചു. കുട്ടികളുടെ ആശുപത്രിക്കും ഒരു സ്കൂളിനും നാശനഷ്ടമുണ്ടായി. വ്യോമം, കര, കടൽ എന്നിവിടങ്ങളിൽനിന്നുള്ള ആയുധങ്ങൾ ഉപയോഗിച്ചാണ് ഉക്രെയ്നിലെ സൈനിക കേന്ദ്രങ്ങളും ആയുധ-വിതരണ ഗോഡൗണുകളും ലക്ഷ്യമിട്ടതെന്ന് റഷ്യൻ പ്രതിരോധ മന്ത്രാലയം അറിയിച്ചു. 726 ഉക്രെയ്ൻ ഡ്രോണുകൾ വെടിവെച്ചിട്ടതായും റഷ്യ അവകാശപ്പെട്ടു.

ആക്രമണത്തിൽ ഉണ്ടായ മരണങ്ങൾക്ക് പ്രധാന കാരണം രാജ്യത്തെ വ്യോമപ്രതിരോധ മിസൈലുകളുടെ അപര്യാപ്തതയാണെന്ന് ഉക്രെയ്ൻ പ്രസിഡന്റ് വൊളോഡിമിർ സെലൻസ്കി പറഞ്ഞു. പാശ്ചാത്യ രാജ്യങ്ങളിൽ നിന്നുള്ള വ്യോമപ്രതിരോധ സംവിധാനങ്ങളെയും മിസൈലുകളെയും ഉക്രെയ്ൻ പ്രധാനമായും ആശ്രയിക്കുന്ന സാഹചര്യത്തിലാണ് ക്ഷാമം രൂക്ഷമായത്.

“ഉക്രെയ്ൻ ആവശ്യത്തിന് ബാലിസ്റ്റിക് മിസൈൽ പ്രതിരോധ സംവിധാനങ്ങൾ കൈവശം വയ്ക്കാത്തിടത്തോളം റഷ്യ സമാധാനത്തെക്കുറിച്ച് ഗൗരവമായി ചിന്തിക്കില്ല,” സെലൻസ്കി ടെലഗ്രാമിൽ കുറിച്ചു.

പ്രാദേശിക സമയം അർധരാത്രിയോടെയാണ് കീവിൽ ആക്രമണം ആരംഭിച്ചത്. നഗരത്തിലുടനീളം വ്യോമാക്രമണ മുന്നറിയിപ്പ് സൈറണുകൾ മുഴങ്ങിയതിന് പിന്നാലെ ഏകദേശം 20 റഷ്യൻ മിസൈലുകൾ പതിച്ചതായി റിപ്പോർട്ടുണ്ട്. ആക്രമണത്തെ തുടർന്ന് ആയിരക്കണക്കിന് വീടുകളിലേക്കുള്ള വൈദ്യുതി ബന്ധം വിച്ഛേദിക്കപ്പെട്ടു. കീവ് മേഖലയിലെ പല പ്രദേശങ്ങളും ഇരുട്ടിലായി. കൊല്ലപ്പെട്ടവരുടെ സ്മരണയ്ക്കായി വെള്ളിയാഴ്ച ഔദ്യോഗിക ദുഃഖാചരണം പ്രഖ്യാപിച്ചു.

കീവിന് സമീപമുള്ള ബ്രോവറി, ബോറിസ്പിൽ ജില്ലകളിലും ആക്രമണമുണ്ടായി. ഇവിടെ ഒരാൾ കൊല്ലപ്പെടുകയും ഏഴ് പേർക്ക് പരിക്കേൽക്കുകയും ചെയ്തു. ഡൊണെറ്റ്സ്ക് മേഖലയിലുണ്ടായ മറ്റൊരു ആക്രമണത്തിൽ ഒരാൾ കൊല്ലപ്പെടുകയും 11 പേർക്ക് പരിക്കേൽക്കുകയും ചെയ്തതായി പ്രാദേശിക അധികൃതർ അറിയിച്ചു.

അതിനിടെ, ഉക്രെയ്ൻ അതിർത്തിയോട് ചേർന്ന വടക്കൻ മേഖലയിൽ ഒരു ഡ്രോൺ റൊമാനിയൻ വ്യോമപരിധിയിൽ പ്രവേശിച്ചതായി റൊമാനിയൻ പ്രതിരോധ മന്ത്രാലയം അറിയിച്ചു. ഇതേത്തുടർന്ന് വ്യോമാക്രമണ മുന്നറിയിപ്പ് സൈറൺ മുഴങ്ങി. പിന്നീട് ജനവാസമില്ലാത്ത പ്രദേശത്താണ് ഡ്രോൺ തകർന്നുവീണത്.

ഉക്രെയ്നിൽ നിന്നുള്ള ഡ്രോൺ ഭീഷണി കണക്കിലെടുത്ത് പോളിഷ് സൈന്യവും രാജ്യത്തിന്റെ വ്യോമപരിധി സംരക്ഷിക്കുന്നതിനായി “പ്രതിരോധ വ്യോമ പ്രവർത്തനങ്ങൾ” ആരംഭിച്ചതായി അറിയിച്ചു.

അതേസമയം, യുദ്ധത്തിന്റെ ഭാഗമായി റഷ്യയും ഉക്രെയ്നും സമീപ ആഴ്ചകളിൽ വൻതോതിലുള്ള വ്യോമാക്രമണങ്ങൾ തുടരുകയാണ്. ഇരു രാജ്യങ്ങളുടെയും ആക്രമണങ്ങളിൽ നിരവധി സാധാരണക്കാർ കൊല്ലപ്പെടുകയും പരിക്കേൽക്കുകയും ചെയ്തിട്ടുണ്ട്.

കഴിഞ്ഞ വാരാന്ത്യത്തിൽ മോസ്കോയെ ലക്ഷ്യമിട്ട് ഉക്രെയ്ൻ ഏകദേശം 600 ഡ്രോണുകൾ ഉപയോഗിച്ച് ആക്രമണം നടത്തിയിരുന്നു. ഈ ആഴ്ച റഷ്യയിൽ നടന്ന രണ്ട് വ്യത്യസ്ത ആക്രമണങ്ങളിൽ ഒരു കുട്ടിയുൾപ്പെടെ കുറഞ്ഞത് 16 പേർ കൊല്ലപ്പെട്ടതായും റിപ്പോർട്ടുണ്ട്.

ജൂലൈ മുതൽ റഷ്യയിലെ ഓൺലൈൻ റീട്ടെയിൽ സ്ഥാപനമായ വൈൽഡ്ബെറീസിന്റെ വിവിധ കേന്ദ്രങ്ങൾ ഉക്രെയ്ൻ തുടർച്ചയായി ലക്ഷ്യമിടുന്നുണ്ട്. റഷ്യയിൽ ആമസോണിന് സമാനമായ വലിയ ഓൺലൈൻ വ്യാപാര സ്ഥാപനമാണ് വൈൽഡ്ബെറീസ്. ഏറ്റവും പുതിയ ആക്രമണത്തോടെ കമ്പനിയുടെ 10 ലോജിസ്റ്റിക്സ് കേന്ദ്രങ്ങളിൽ ഏഴെണ്ണവും പ്രവർത്തനരഹിതമായതായി ഉക്രെയ്ൻ പ്രതിരോധ മന്ത്രാലയം അവകാശപ്പെട്ടു.

ഇതിനിടെ, വെടിനിർത്തൽ സാധ്യമാക്കുന്നതിനുള്ള നയതന്ത്ര ശ്രമങ്ങളിൽ കാര്യമായ പുരോഗതി ഉണ്ടായിട്ടില്ല. സാധാരണക്കാരെ ലക്ഷ്യമിട്ട് ആക്രമണം നടത്തുന്നതായി റഷ്യയും ഉക്രെയ്നും പരസ്പരം ആരോപണം ഉന്നയിക്കുന്ന സാഹചര്യമാണ് നിലവിലുള്ളത്.

2022 ഫെബ്രുവരിയിലാണ് റഷ്യ ഉക്രെയ്നെതിരെ സമ്പൂർണ അധിനിവേശം ആരംഭിച്ചത്. നിലവിൽ ഉക്രെയ്ന്റെ ഏകദേശം അഞ്ചിലൊന്ന് പ്രദേശം റഷ്യയുടെ നിയന്ത്രണത്തിലാണ്. ഇവയിൽ ഭൂരിഭാഗവും രാജ്യത്തിന്റെ കിഴക്കൻ അതിർത്തി പ്രദേശങ്ങളിലാണ്.

Share This Article
Leave a Comment

Leave a Reply

Your email address will not be published. Required fields are marked *

×