ചുരിദാറോ സാരിയോ? വസ്ത്രധാരണം പൗരന്റെ വ്യക്തിപരമായ തിരഞ്ഞെടുപ്പ്

Parvathy Kailas
2 Min Read

ഒരാൾ ഏത് വസ്ത്രം ധരിക്കണമെന്നത് വ്യക്തിപരമായ തിരഞ്ഞെടുപ്പാണെന്നും നിയമത്തിന്റെ പിൻബലമില്ലാതെ ഒരു വ്യക്തിയുടെയോ സമൂഹത്തിന്റെയോ ഇഷ്ടാനുസരണം വസ്ത്രധാരണം നിർബന്ധിക്കാനാകില്ലെന്നും കേരള ഹൈക്കോടതി. സാരി ധരിച്ചില്ലെന്ന കാരണത്താൽ ചുരിദാർ ധരിച്ചെത്തിയ പ്രധാനാധ്യാപികയെ സ്കൂൾ ഗേറ്റിൽ തടഞ്ഞ സംഭവത്തിലാണ് ജസ്റ്റിസ് പി.വി. കുഞ്ഞികൃഷ്ണന്റെ നിർണായക നിരീക്ഷണം.

Ref.No:DPCI-PKD-50

കൊട്ടാരക്കരയിലെ ഈശ്വരവിലാസം ഹൈസ്കൂളിലെ പ്രധാനാധ്യാപിക സിന്ധു എസ്. നായർ സമർപ്പിച്ച ഹർജി പരിഗണിക്കവെയാണ് കോടതി വ്യക്തിയുടെ വസ്ത്രധാരണ സ്വാതന്ത്ര്യത്തെക്കുറിച്ച് സുപ്രധാന നിലപാട് വ്യക്തമാക്കിയത്. ചുരിദാർ ധരിച്ചതിന്റെ പേരിൽ സ്കൂളിൽ പ്രവേശനം തടയുന്നതായി ആരോപിച്ചായിരുന്നു പ്രധാനാധ്യാപിക കോടതിയെ സമീപിച്ചത്.

ഒരു പൗരൻ ഏത് വസ്ത്രം ധരിക്കണമെന്നത് സാധാരണയായി അയാളുടെ വ്യക്തിപരമായ തിരഞ്ഞെടുപ്പാണെന്ന് കോടതി ചൂണ്ടിക്കാട്ടി. നിയമത്തിന്റെ പിന്തുണയില്ലാതെ ഒരു വ്യക്തിക്കോ സമൂഹത്തിനാകമാനമോ ഒരു പൗരൻ എങ്ങനെ വസ്ത്രം ധരിക്കണമെന്ന് നിർദേശിക്കാനാവില്ലെന്നും ഇത് ഓരോ പൗരന്റെയും മൗലികാവകാശത്തിന്റെ ഭാഗമാണെന്നും കോടതി വ്യക്തമാക്കി.

വസ്ത്രധാരണം ഒരാളുടെ സംസ്കാരം, സൗകര്യം, വ്യക്തിത്വം, വ്യക്തിപരമായ ഇഷ്ടം എന്നിവയുമായി ബന്ധപ്പെട്ട വിഷയമാണെന്നും അതിന്റെ പേരിൽ ഒരു വ്യക്തിയുടെ അന്തസ്സോ കഴിവോ അളക്കാനാകില്ലെന്നും കോടതി നിരീക്ഷിച്ചു.

സാരി ഒരാൾക്ക് മാന്യവും മനോഹരവുമായ വസ്ത്രമായി തോന്നാം. എന്നാൽ ഒരാളുടെ വ്യക്തിപരമായ ഇഷ്ടത്തെ അടിസ്ഥാനമാക്കി അതിന്റെ മാന്യതയെ നിർബന്ധിത യൂണിഫോമാക്കി മാറ്റാനാകില്ലെന്ന് കോടതി വ്യക്തമാക്കി.

അതുപോലെ, പ്രൊഫഷണൽ സാഹചര്യത്തിൽ മാന്യമായും അനുയോജ്യമായും ധരിക്കുന്ന ചുരിദാർ ഒരു പ്രധാനാധ്യാപികയുടെ കഴിവിനെയോ ഔദ്യോഗിക അന്തസ്സിനെയോ അധികാരത്തെയോ കുറയ്ക്കുന്നില്ലെന്നും കോടതി പറഞ്ഞു.

ഹർജിക്കാരിയുടെ ആരോപണമനുസരിച്ച്, സ്കൂൾ മാനേജർ അവരുടെ ഓഫീസിലെത്തി ഇനി സ്കൂളിൽ ചുരിദാർ ധരിക്കരുതെന്നും സാരി മാത്രമേ ധരിക്കാവൂ എന്നും നിർദേശിച്ചു. ചുരിദാർ ധരിച്ച് എത്തിയാൽ സ്കൂൾ ഗേറ്റിൽ തടയാൻ സുരക്ഷാ ജീവനക്കാർക്ക് നിർദേശം നൽകിയതായും പ്രധാനാധ്യാപിക ആരോപിച്ചു.

തുടർന്ന് ചുരിദാർ ധരിച്ച് സ്കൂളിലെത്തിയ ദിവസം സുരക്ഷാ ജീവനക്കാർ അവരെ ഗേറ്റിൽ തടഞ്ഞു. തുടർന്ന് അവർ പൊലീസിനെ സമീപിക്കുകയും പൊലീസ് ഇടപെടലിനെ തുടർന്ന് സ്കൂളിൽ പ്രവേശിക്കാനാകുകയും ചെയ്തു. സംഭവവുമായി ബന്ധപ്പെട്ട് പരാതി നൽകുകയും എഫ്ഐആർ രജിസ്റ്റർ ചെയ്യുകയും ചെയ്തതായി കോടതി രേഖകളിൽ പറയുന്നു.

അധ്യാപകരുടെ വസ്ത്രധാരണവുമായി ബന്ധപ്പെട്ട് 2015ൽ ഡയറക്ടർ ഓഫ് ജനറൽ എജ്യുക്കേഷൻ പുറത്തിറക്കിയ സർക്കുലറും ഹർജിക്കാരി കോടതിയുടെ ശ്രദ്ധയിൽപ്പെടുത്തി. അധ്യാപകർ ചുരിദാർ ധരിക്കുന്നതിന് ഈ സർക്കുലർ വിലക്ക് ഏർപ്പെടുത്തുന്നില്ലെന്ന് കോടതി ചൂണ്ടിക്കാട്ടി.

വിദ്യാഭ്യാസ വകുപ്പിന്റെ നിർദേശങ്ങൾ പ്രകാരം ചുരിദാർ അനുവദനീയമായിരിക്കെ, മാനേജർക്ക് സ്വന്തം വ്യക്തിപരമായ ഇഷ്ടം അധ്യാപികയ്ക്കുമേൽ അടിച്ചേൽപ്പിക്കാനാകില്ലെന്ന നിലപാടാണ് കോടതി സ്വീകരിച്ചത്.

വസ്ത്രം ഒരാളുടെ വ്യക്തിപരമായ തിരഞ്ഞെടുപ്പാണ്; നിയമത്തിന്റെ പിന്തുണയില്ലാതെ സമൂഹത്തിന്റെയോ മറ്റൊരു വ്യക്തിയുടെയോ ഇഷ്ടം ആ തിരഞ്ഞെടുപ്പിന് മേൽ അടിച്ചേൽപ്പിക്കാനാകില്ല എന്നതാണ് കേസിൽ നിന്ന് വ്യക്തമാകുന്ന പ്രധാന സന്ദേശം.

അതേസമയം, സ്ഥാപനങ്ങൾക്ക് ബാധകമായ നിയമപരമായ ഡ്രസ് കോഡ് നിലവിലുണ്ടെങ്കിൽ അതിന്റെ പരിധിയിൽ ആവശ്യമായ നിയന്ത്രണങ്ങൾ ഏർപ്പെടുത്തുന്നതിന് ബന്ധപ്പെട്ട അധികാരികൾക്ക് നിയമാനുസൃതമായി നടപടിയെടുക്കാമെന്നും കോടതി വ്യക്തമാക്കി.

TAGGED:
Share This Article
Leave a Comment

Leave a Reply

Your email address will not be published. Required fields are marked *

×