ന്യൂഡൽഹി: ഗുരുതരാവസ്ഥയിലായ രോഗിയെ മറ്റൊരു ആശുപത്രിയിലേക്ക് മാറ്റുന്നതിന് ലൈഫ് സപ്പോർട്ട് സൗകര്യമുള്ള ആംബുലൻസും ഡോക്ടറെയും ഒരുക്കാതിരുന്ന ഡൽഹിയിലെ മെട്രോ ഹോസ്പിറ്റലിന് 15.50 ലക്ഷം രൂപ നഷ്ടപരിഹാരം നൽകാൻ സംസ്ഥാന ഉപഭോക്തൃ തർക്ക പരിഹാര കമ്മീഷന്റെ ഉത്തരവ്. രോഗിയുടെ സുരക്ഷിതമായ ആശുപത്രി മാറ്റം ഉറപ്പാക്കേണ്ടത് ആശുപത്രിയുടെ അടിസ്ഥാന ഉത്തരവാദിത്തമാണെന്ന് കമ്മീഷൻ വ്യക്തമാക്കി.

സുരേഷ് കുമാർ എന്ന രോഗിയുമായി ബന്ധപ്പെട്ട പരാതിയിലാണ് നടപടി. 2013 നവംബർ 13-ന് കടുത്ത ശ്വാസതടസ്സത്തെ തുടർന്ന് മെട്രോ ആശുപത്രിയിൽ പ്രവേശിപ്പിച്ച അദ്ദേഹത്തിന് ഹൃദയവാൽവിൽ രക്തക്കട്ട രൂപപ്പെട്ടതായി കണ്ടെത്തിയിരുന്നു. തുടർചികിത്സയ്ക്കിടെ സ്ട്രോക്ക് സംഭവിച്ചതോടെ വിദഗ്ധ ചികിത്സയ്ക്കായി മറ്റൊരു ആശുപത്രിയിലേക്ക് മാറ്റേണ്ടിവന്നു.
എന്നാൽ രോഗിയെ മാറ്റുന്നതിന് ആവശ്യമായ ആംബുലൻസോ കൂടെ പോകാൻ ഡോക്ടറെയോ ആശുപത്രി അധികൃതർ ഏർപ്പെടുത്തിയില്ലെന്നാണ് കുടുംബത്തിന്റെ പരാതി. തുടർന്ന് സ്വന്തം നിലയിൽ ആംബുലൻസ് കണ്ടെത്തി രോഗിയെ മാറ്റേണ്ടിവന്നതോടെ ഏകദേശം അഞ്ചുമണിക്കൂറോളം വൈകിയതായും പരാതിയിൽ ചൂണ്ടിക്കാട്ടി. പിന്നീട് രോഗിക്ക് സംസാരശേഷിയും ഓർമശക്തിയും ഉൾപ്പെടെയുള്ള കഴിവുകൾക്ക് ഗുരുതരമായ തകരാറുകൾ സംഭവിച്ചതായും കുടുംബം അറിയിച്ചു.
ചികിത്സയിൽ മെഡിക്കൽ അശ്രദ്ധയുണ്ടായെന്ന ആരോപണം വിദഗ്ധ പരിശോധനകളുടെ അടിസ്ഥാനത്തിൽ തെളിയിക്കപ്പെട്ടിട്ടില്ലെന്ന് കമ്മീഷൻ നിരീക്ഷിച്ചു. എന്നാൽ രോഗിയെ സുരക്ഷിതമായി മറ്റൊരു ആശുപത്രിയിലേക്ക് മാറ്റുന്നതിനുള്ള അടിസ്ഥാന സൗകര്യങ്ങൾ ഒരുക്കുന്നതിൽ ആശുപത്രിക്ക് വീഴ്ച സംഭവിച്ചതായി കണ്ടെത്തി. അടിയന്തര സാഹചര്യത്തിൽ ആവശ്യമായ ആംബുലൻസും മെഡിക്കൽ ജീവനക്കാരുടെ സഹായവും ഉറപ്പാക്കുന്നത് ആശുപത്രിയുടെ കടമയാണെന്നും വ്യക്തമാക്കി.
ഇതിന്റെ അടിസ്ഥാനത്തിൽ 15 ലക്ഷം രൂപ നഷ്ടപരിഹാരവും നിയമനടപടികളുടെ ചെലവായി 50,000 രൂപയും ഉൾപ്പെടെ ആകെ 15.50 ലക്ഷം രൂപ നൽകാൻ കമ്മീഷൻ ഉത്തരവിട്ടു. രണ്ടുമാസത്തിനകം തുക നൽകിയില്ലെങ്കിൽ പ്രതിവർഷം ഒമ്പത് ശതമാനം പലിശയും നൽകേണ്ടിവരും.
ചികിത്സ നൽകുന്നതിൽ മാത്രം ആശുപത്രിയുടെ ഉത്തരവാദിത്തം അവസാനിക്കുന്നില്ലെന്നും രോഗിയുടെ സുരക്ഷയും തുടർചികിത്സയ്ക്കുള്ള സൗകര്യങ്ങളും ഉറപ്പാക്കണമെന്നും ഓർമിപ്പിക്കുന്നതാണ് ഈ വിധി. ആശുപത്രികളുടെ സേവന നിലവാരത്തെയും രോഗികളുടെ ഉപഭോക്തൃ അവകാശങ്ങളെയും സംബന്ധിച്ചും ഉത്തരവ് നിർണായക സന്ദേശമാണ് നൽകുന്നത്.



