ரயில் போக்குவரத்து மீண்டும் சீரானது
பாலக்காடு: கேரள மாநிலம் பாலக்காடு மாவட்டம் ஷோர்ணூர் ரயில் நிலையத்தில் சரக்கு ரயிலின் ஒரு பெட்டி தடம் புரண்டதால் ரயில் போக்குவரத்தில் பாதிப்பு ஏற்பட்டது. ரயில்வே அதிகாரிகள் மற்றும் மீட்புக் குழுவினரின் தீவிர நடவடிக்கையைத் தொடர்ந்து தடம் புரண்ட பெட்டி அகற்றப்பட்டு, ரயில் போக்குவரத்து மீண்டும் தொடங்கியது.

சனிக்கிழமை இரவு சுமார் 8 மணியளவில் இந்தச் சம்பவம் நடைபெற்றது. மங்களூரு நோக்கிச் சென்று கொண்டிருந்த சரக்கு ரயில், ஷோர்ணூர் ரயில் நிலையத்தின் ஏழாவது நடைமேடையைக் கடந்து சென்றபோது அதன் ஒரு பெட்டி தடம் புரண்டது.
இதனால் அந்தப் பகுதியில் ரயில் இயக்கம் பாதிக்கப்பட்டதுடன், ரயில்வே அதிகாரிகள் உடனடியாக சம்பவ இடத்திற்கு விரைந்து சென்று நிலைமையை ஆய்வு செய்தனர். தடம் புரண்ட பெட்டியை அகற்றுவதற்கான மீட்புப் பணிகளும் துரிதமாக மேற்கொள்ளப்பட்டன.
கேரளாவின் முக்கியமான ரயில் போக்குவரத்து வழித்தடத்தில் அமைந்துள்ள ஷோர்ணூர் ரயில் நிலையத்தில் ஏற்பட்ட இந்தச் சம்பவம், ரயில் பயணிகளிடையே சிரமத்தை ஏற்படுத்தியது.




