ലാഗോസ്: വടക്കൻ-മധ്യ നൈജീരിയയിലെ നൈജർ സംസ്ഥാനത്ത് ഭൂമിയുടമസ്ഥാവകാശ തർക്കത്തെ തുടർന്നുണ്ടായ സാമുദായിക സംഘർഷത്തിൽ കുറഞ്ഞത് 18 പേർ കൊല്ലപ്പെട്ടതായി പൊലീസ് അറിയിച്ചു. കൂടുതൽ അക്രമങ്ങൾ തടയുന്നതിനായി സുരക്ഷ ശക്തമാക്കിയതായും അധികൃതർ വ്യക്തമാക്കി.
റാഫി ലോക്കൽ ഗവൺമെന്റ് ഏരിയയിലെ വിവിധ ഗ്രാമങ്ങളിലാണ് തിങ്കളാഴ്ച മുതൽ വ്യാഴാഴ്ച വരെ ആക്രമണങ്ങൾ നടന്നത്. ഗോഡോറോ ഗ്രാമത്തിൽ താമസക്കാരനായ ഇബ്രാഹിം മൂസയെ ആയുധധാരികൾ തിങ്കളാഴ്ച വെടിവെച്ച് കൊലപ്പെടുത്തിയതോടെയാണ് സംഭവങ്ങളുടെ തുടക്കമെന്ന് നൈജർ സ്റ്റേറ്റ് പൊലീസ് കമാൻഡ് അറിയിച്ചു.
ഈ കൊലപാതകത്തിന് പിന്നാലെ പ്രതികാരാക്രമണങ്ങൾ അരങ്ങേറി. പ്രാദേശിക വിജിലൻസ് സംഘമായ ‘യാൻസകായ്’ (Yansakai) അംഗങ്ങൾ പ്രതികാര നടപടിയുടെ ഭാഗമായി റോഡ് ഉപരോധിച്ച് ബഷീർ മാസിയെ കൊലപ്പെടുത്തിയതായി പൊലീസ് വക്താവ് വസിയു അബിയോഡുൻ അറിയിച്ചു.
തുടർന്ന് ബുധനാഴ്ചയും വ്യാഴാഴ്ചയും കതാക്കോ ജില്ലയിലെ അങ്വാൻ-ബാഗോ (Angwan-Baago) ഗ്രാമത്തിലേക്ക് ആയുധധാരികൾ ആക്രമണം നടത്തി. ആക്രമണത്തിനിടെ ഒരു വീടിന് തീയിട്ടതിനെ തുടർന്ന് 15 പേർ വെന്തുമരിക്കുകയും, മറ്റൊരു സ്ഥലത്ത് ഒരാൾ കൂടി കൊല്ലപ്പെടുകയും ചെയ്തതായി പൊലീസ് വ്യക്തമാക്കി.
സംഭവത്തെ തുടർന്ന് പൊലീസ്, സൈന്യം, മറ്റ് സുരക്ഷാസേനകൾ എന്നിവയെ പ്രദേശത്ത് വിന്യസിച്ച് സ്ഥിതിഗതികൾ നിയന്ത്രണവിധേയമാക്കാനുള്ള നടപടികൾ സ്വീകരിച്ചിട്ടുണ്ട്.
സംഘർഷത്തിന്റെ അടിസ്ഥാന കാരണങ്ങൾ കണ്ടെത്തി പ്രശ്നത്തിന് സ്ഥിരപരിഹാരം കാണുന്നതിനായി റാഫി ലോക്കൽ ഗവൺമെന്റ് ചെയർമാന്റെ നേതൃത്വത്തിൽ ജില്ലാ മേധാവിയും മറ്റ് പ്രധാന പങ്കാളികളും ഉൾപ്പെട്ട അനുരഞ്ജന സമിതി രൂപീകരിച്ചതായും അധികൃതർ അറിയിച്ചു. ആക്രമണത്തിന് ഉത്തരവാദികളായവരെ കണ്ടെത്തി അറസ്റ്റ് ചെയ്യുന്നതിനുള്ള അന്വേഷണം പുരോഗമിക്കുകയാണെന്ന് പൊലീസ് അറിയിച്ചു.
നൈജീരിയയിലെ മിഡിൽ ബെൽറ്റ്, വടക്കൻ-മധ്യ മേഖലകൾ എന്നിവിടങ്ങളിൽ ഭൂമിയുടമസ്ഥാവകാശം, മേച്ചിൽപ്പുറങ്ങൾ, പ്രകൃതി വിഭവങ്ങളുടെ ഉപയോഗാവകാശം എന്നിവയെ ചൊല്ലിയുള്ള സാമുദായിക സംഘർഷങ്ങൾ പതിവായി ആവർത്തിക്കുന്ന സുരക്ഷാ വെല്ലുവിളികളിലൊന്നാണ്.
