ജൊഹന്നാസ്ബർഗ്: ദക്ഷിണാഫ്രിക്കയിൽ രേഖകളില്ലാതെ 30 ലക്ഷത്തിലധികം വിദേശ പൗരന്മാർ അനധികൃതമായി താമസിക്കുന്നതായി റിപ്പോർട്ടുകളുണ്ട്. ആഫ്രിക്കയിലെ വിവിധ രാജ്യങ്ങളിൽ നിന്നുള്ള കുടിയേറ്റക്കാരും അഭയാർഥികളും രാജ്യത്ത് കഴിയുന്നുണ്ട്.
ഇതിനിടെ, രാജ്യത്തെ യുവാക്കൾക്കിടയിലെ തൊഴിലില്ലായ്മ അനധികൃത കുടിയേറ്റക്കാരുടെ സാന്നിധ്യം മൂലം വർധിച്ചുവരുന്നതായി പ്രാദേശിക ജനവിഭാഗങ്ങൾ ആരോപിക്കുന്നു. ഇതിനെ തുടർന്ന്, രാജ്യത്ത് അനധികൃതമായി കഴിയുന്നവരെ കണ്ടെത്തി അവരുടെ സ്വദേശങ്ങളിലേക്ക് തിരിച്ചയക്കണമെന്ന് ആവശ്യപ്പെട്ട് വിവിധ സംഘടനകൾ പ്രതിഷേധം ശക്തമാക്കിയിരിക്കുകയാണ്.
കഴിഞ്ഞ കുറച്ച് ദിവസങ്ങളായി രാജ്യവ്യാപകമായി തുടരുന്ന പ്രതിഷേധങ്ങൾ ചില സ്ഥലങ്ങളിൽ അക്രമ സംഭവങ്ങളിലേക്കും വഴിമാറിയിട്ടുണ്ട്. ഈ സാഹചര്യത്തിൽ, അനധികൃത കുടിയേറ്റക്കാരെ നാടുകടത്തണമെന്ന് ആവശ്യപ്പെട്ട് ഇന്നലെ നടന്ന പ്രതിഷേധത്തിനിടെ രാജ്യത്തിന്റെ വിവിധ ഭാഗങ്ങളിൽ നിന്ന് ഏകദേശം 1,000 പേരെ പൊലീസ് അറസ്റ്റ് ചെയ്തതായി അധികൃതർ അറിയിച്ചു.
പ്രതിഷേധത്തിനിടെ ചില കടകൾ ആക്രമിക്കപ്പെടുകയും കൊള്ളയടിക്കപ്പെടുകയും ചെയ്തതായി റിപ്പോർട്ടുകളുണ്ട്. കൂടാതെ, പ്രതിഷേധത്തിനിടെയുണ്ടായ വെടിവെപ്പിൽ ഒരാൾ കൊല്ലപ്പെട്ടതായും സ്ഥിരീകരിച്ചിട്ടുണ്ട്. പ്രതിഷേധം കൂടുതൽ ശക്തമാക്കുമെന്ന് സംഘാടകർ പ്രഖ്യാപിച്ചതോടെ ദക്ഷിണാഫ്രിക്കയിൽ സുരക്ഷാ സാഹചര്യം കൂടുതൽ ആശങ്കാജനകമായിരിക്കുകയാണ്.
