ബെംഗളൂരു: ഇന്ത്യയിൽ സ്വകാര്യ മേഖലയിൽ വികസിപ്പിച്ച ആദ്യത്തെ ഓർബിറ്റൽ-ക്ലാസ് റോക്കറ്റായ ‘വിക്രം-1′ (Vikram-1) കന്നി വിക്ഷേപണത്തിനൊരുങ്ങുന്നു. ഹൈദരാബാദ് ആസ്ഥാനമായി പ്രവർത്തിക്കുന്ന സ്വകാര്യ ബഹിരാകാശ വിക്ഷേപണ കമ്പനിയായ സ്കൈറൂട്ട് എയറോസ്പേസ് (Skyroot Aerospace) ആണ് ഇക്കാര്യം അറിയിച്ചത്.
’മിഷൻ ആഗമൻ’ (Mission Aagaman) എന്ന് പേരിട്ടിരിക്കുന്ന വിക്രം-1-ന്റെ ആദ്യ പരീക്ഷണ പറക്കലിനുള്ള വിക്ഷേപണ വിൻഡോ ജൂലൈ 12 നും ഓഗസ്റ്റ് 4 നും ഇടയിലായിരിക്കുമെന്ന് ജൂലൈ 2-ന് കമ്പനി വ്യക്തമാക്കി. ശ്രീഹരിക്കോട്ടയിലെ സതീഷ് ധവാൻ സ്പേസ് സെന്ററിലെ വിക്ഷേപണ തറയിലാണ് നിലവിൽ റോക്കറ്റുള്ളത്.
ഇന്ത്യൻ ബഹിരാകാശ രംഗത്ത് സ്വകാര്യ പങ്കാളിത്തം വർദ്ധിപ്പിക്കുന്നതിൽ നിർണായക നാഴികക്കല്ലാകുന്ന ഒന്നാണ് സ്കൈറൂട്ട് എയറോസ്പേസിന്റെ ഈ ദൗത്യം.
