ബെഡ്ഫോർഡ്: യുകെയിലെ ബെഡ്ഫോർഡിന് സമീപം രണ്ട് പാസഞ്ചർ ട്രെയിനുകൾ കൂട്ടിയിടിച്ച് വൻ അപകടം. അപകടത്തിൽ ഒരു ട്രെയിൻ ഡ്രൈവർ മരണപ്പെടുകയും 89 പേർക്ക് പരിക്കേൽക്കുകയും ചെയ്തു. പരിക്കേറ്റവരിൽ 11 പേരുടെ നില അതീവ ഗുരുതരമാണ്. 22 പേർക്ക് ഗുരുതരമായ പരിക്കുകളുണ്ട്. 56 പേർ നിസാര പരിക്കുകളോടെ രക്ഷപ്പെട്ടു.
വെള്ളിയാഴ്ച വൈകുന്നേരം പ്രാദേശിക സമയം 5:15-ഓടെയായിരുന്നു അപകടം. ലണ്ടൻ സെന്റ് പാൻക്രാസിലേക്ക് (London St Pancras) പോവുകയായിരുന്ന രണ്ട് ഈസ്റ്റ് മിഡ്ലാൻഡ്സ് റെയിൽവേ (EMR) സർവീസുകളാണ് അപകടത്തിൽപ്പെട്ടത്. ഒരു ട്രെയിൻ മുന്നിലുണ്ടായിരുന്ന മറ്റൊരു ട്രെയിനിന് പിന്നിൽ ഇടിക്കുകയായിരുന്നു എന്നാണ് വിവരം. ശക്തമായ സ്ഫോടനം ഉണ്ടായതുപോലെയാണ് തങ്ങൾക്ക് അനുഭവപ്പെട്ടതെന്ന് മുൻ വശത്തെ കോച്ചിലുണ്ടായിരുന്ന യാത്രക്കാർ പറഞ്ഞു.
അപകടത്തെത്തുടർന്ന് ബ്രിട്ടീഷ് ട്രാൻസ്പോർട്ട് പോലീസ് പ്രദേശത്ത് അടിയന്തരാവസ്ഥ പ്രഖ്യാപിച്ചു. മുൻപ് റെയിൽവേ യൂണിയൻ (RMT) പ്രതിനിധിയായിരുന്ന ആളാണ് മരിച്ച ഡ്രൈവർ എന്ന് യൂണിയൻ ഭാരവാഹികൾ സ്ഥിരീകരിച്ചു.
അപകടത്തെത്തുടർന്ന് ലണ്ടൻ സെന്റ് പാൻക്രാസിലേക്കുള്ള ട്രെയിൻ സർവീസുകൾ താൽക്കാലികമായി നിർത്തിവെച്ചു. അപകടത്തിന്റെ കൃത്യമായ കാരണം കണ്ടെത്താൻ അന്വേഷണം ആരംഭിച്ചിട്ടുണ്ട്.
