ഉഷ്ണതരംഗത്തിൽ വെന്തുരുകി ഫ്രാൻസ്; എസി വാങ്ങാൻ വൻ ജനക്കൂട്ടം, സൂപ്പർമാർക്കറ്റ് തല്ലിപ്പൊളിച്ചു, പാരീസിൽ പോലീസ് കാവൽ!
അന്താരാഷ്ട്ര ഡെസ്ക്:
യൂറോപ്പിൽ ആഞ്ഞടിക്കുന്ന കടുത്ത ഉഷ്ണതരംഗത്തിനിടയിൽ ഫ്രാൻസിലെ പ്രമുഖ സൂപ്പർമാർക്കറ്റുകളിൽ എയർ കണ്ടീഷണറുകൾക്കും ഫാനുകൾക്കുമായി ജനങ്ങളുടെ വൻ തള്ളിക്കയറ്റവും സംഘർഷവും. പ്രശസ്ത ഡിസ്കൗണ്ട് റീട്ടെയിലറായ ‘ലിഡിൽ’ (Lidl) കൂളിംഗ് ഉപകരണങ്ങൾക്ക് വൻ വിലക്കിഴിവ് പ്രഖ്യാപിച്ചതോടെയാണ് രാജ്യം കണ്ട ഏറ്റവും വലിയ സൂപ്പർമാർക്കറ്റ് യുദ്ധത്തിന് പാരീസ് സാക്ഷിയായത്.
നിയന്ത്രണം വിട്ട് ജനക്കൂട്ടം; വാതിൽ തല്ലിപ്പൊളിച്ചു
തലസ്ഥാനമായ പാരീസിലെ മിക്ക ലിഡിൽ സ്റ്റോറുകൾക്ക് മുന്നിലും പുലർച്ചെ മുതൽ തന്നെ കിലോമീറ്ററുകളോളം നീണ്ട ക്യൂവാണ് അനുഭവപ്പെട്ടത്. തിരക്ക് നിയന്ത്രണാതീതമായതോടെ പലയിടങ്ങളിലും കനത്ത പോലീസ് കാവൽ ഏർപ്പെടുത്തേണ്ടി വന്നു. പാരീസിന്റെ പ്രാന്തപ്രദേശമായ നാൻതെയറിൽ (Nanterre) സൂപ്പർമാർക്കറ്റ് തുറക്കുന്നതിന് മുൻപ് തന്നെ ആവേശം മൂത്ത ഉപഭോക്താക്കൾ കടയുടെ പ്രധാന പ്രവേശന കവാടം തല്ലിപ്പൊളിച്ച് അകത്തുകയറി. മിനിറ്റുകൾക്കകമാണ് സ്റ്റോക്കിലുണ്ടായിരുന്ന എസികളും ഫാനുകളും വിറ്റുപോയത്. ആഗോളതാപനവും കാലാവസ്ഥാ വ്യതിയാനവും യൂറോപ്യൻ രാജ്യങ്ങളെ എത്രത്തോളം ഭീതിദമായി ബാധിക്കുന്നു എന്നതിന്റെ തെളിവാണ് ഈ സംഭവമെന്ന് വിദഗ്ധർ ചൂണ്ടിക്കാണിക്കുന്നു.
