മനാമ: ഹോർമുസ് കടലിടുക്കിൽ (Strait of Hormuz) വ്യാഴാഴ്ച (ജൂൺ 25) കപ്പലിന് നേരെ ഉണ്ടായ ആക്രമണത്തെത്തുടർന്ന്, യുദ്ധ പ്രദേശത്ത് കുടുങ്ങിപ്പോയ നാവികരെ ഒഴിപ്പിക്കാനുള്ള ശ്രമങ്ങൾ ഐക്യരാഷ്ട്രസഭ (UN) താൽക്കാലികമായി നിർത്തിവെച്ചു. ഈ തന്ത്രപ്രധാനമായ ജലപാതയിലൂടെ കടന്നുപോകുന്ന കപ്പലുകളിൽ നിന്ന് ഇറാൻ ഫീസ് ഈടാക്കാൻ നീക്കം നടത്തുന്നതിനെതിരെ അമേരിക്ക മുന്നറിയിപ്പ് നൽകിയതിന് പിന്നാലെയാണ് ഈ പുതിയ സംഭവം.
ഹോർമുസ് കടലിടുക്കിൽ വെച്ച് ഇറാൻ ഒരു കണ്ടെയ്നർ കപ്പലിന് നേരെ ആക്രമണം നടത്തിയതായി ‘ന്യൂയോർക്ക് ടൈംസ്’ ഉൾപ്പെടെയുള്ള പ്രമുഖ യുഎസ് മാധ്യമങ്ങൾ റിപ്പോർട്ട് ചെയ്തു. സംഭവത്തിന് പിന്നാലെ, ഇവിടുത്തെ കപ്പൽ ഗതാഗതം നിയന്ത്രിക്കുന്ന ഇറാനിയൻ ഏജൻസി കടുത്ത മുന്നറിയിപ്പുമായി രംഗത്തെത്തിയിട്ടുണ്ട്.
“പെർഷ്യൻ ഗൾഫ് സ്ട്രെയിറ്റ് അതോറിറ്റി (PGSA) നിശ്ചയിച്ചിട്ടുള്ള സുരക്ഷാ ചട്ടക്കൂടിന് പുറത്തുള്ള റൂട്ടുകളിലൂടെയുള്ള യാത്രകൾക്ക് സുരക്ഷിതമായി കടന്നുപോകാനുള്ള യാതൊരു ഉറപ്പും നൽകാൻ കഴിയില്ല,” എന്ന് അതോറിറ്റി തങ്ങളുടെ എക്സ് (X) ഹാൻഡിലിൽ വ്യക്തമാക്കി.
യുദ്ധസമയത്ത് ഇറാൻ ഈ കടലിടുക്കിൽ ഉപരോധം ഏർപ്പെടുത്തിയത് ആഗോളതലത്തിൽ വലിയ സാമ്പത്തിക പ്രതിസന്ധിക്ക് കാരണമായിരുന്നു. ഇതിന് പിന്നാലെയാണ് ‘മാരിടൈം സർവീസ് ഫീസ്’ എന്ന പേരിൽ പുതിയ ചാർജ് ഈടാക്കാൻ ഇറാൻ പദ്ധതിയിടുന്നത്. ഫെബ്രുവരി അവസാന വാരം ആരംഭിച്ച സംഘർഷം അവസാനിപ്പിക്കുന്നതിനായി പ്രാഥമിക ധാരണാപത്രത്തിൽ ഒപ്പുവെച്ചതിന് ശേഷം, അന്തിമ സമാധാന കരാറിലെത്താൻ ശ്രമിക്കുന്ന യുഎസും ഇറാനും തമ്മിലുള്ള ചർച്ചകളെ ഈ പുതിയ സംഭവവികാസങ്ങൾ കൂടുതൽ സങ്കീർണ്ണമാക്കിയേക്കും.
