തിരുവല്ല: അധികമാരും കേട്ടിട്ടില്ലാത്ത ഒരു തദ്ദേശീയ കായിക ഇനത്തിൽ രാജ്യാന്തര തലത്തിൽ ചരിത്രവിജയം കുറിച്ച് ഇന്ത്യ. തമിഴ്നാട്ടിൽ രൂപംകൊണ്ട റോക്കറ്റ് ബോൾ എന്ന കായിക ഇനത്തിന്റെ പ്രഥമ രാജ്യാന്തര ചാമ്പ്യൻഷിപ്പിൽ പുരുഷ, വനിതാ വിഭാഗങ്ങളിൽ ഒരുപോലെ സ്വർണമെഡൽ സ്വന്തമാക്കിയാണ് ഇന്ത്യൻ താരങ്ങൾ രാജ്യത്തിന്റെ അഭിമാനമായത്. ഈ ചരിത്രവിജയത്തിൽ നിർണായക പങ്കുവഹിച്ചത് മലയാളി താരങ്ങളാണെന്നത് കേരളത്തിന് ഇരട്ടി അഭിമാനമായി.

പത്തംഗ പുരുഷ ടീമിനെ നയിച്ചത് മലയാളിയായ കെ.എ. അഖിൽ കുമാറായിരുന്നു. സോനു സുശീലനായിരുന്നു ടീമിന്റെ വൈസ് ക്യാപ്റ്റൻ. വനിതാ ടീമിന്റെ വൈസ് ക്യാപ്റ്റൻ സ്ഥാനത്തും മലയാളി താരത്തിന്റെ സാന്നിധ്യമുണ്ടായിരുന്നു.
കളിക്കളത്തിലെ മികവിനൊപ്പം നേതൃത്വപാടവവും ടീം ഏകോപനവും പ്രകടിപ്പിച്ച മലയാളി താരങ്ങൾ ഇന്ത്യയുടെ ഇരട്ട സ്വർണനേട്ടത്തിൽ നിർണായക പങ്കുവഹിച്ചു. രാജ്യാന്തര വേദിയിൽ ഇന്ത്യയുടെ ദേശീയപതാക ഉയർത്തിയ ഈ നേട്ടം കേരളത്തിന്റെ കായികചരിത്രത്തിലും ശ്രദ്ധേയമായ അധ്യായമാണ്.
റോക്കറ്റ് ബോളിന്റെ ഉത്ഭവത്തിനു പിന്നിൽ മനോഹരമായൊരു മനുഷ്യസ്നേഹത്തിന്റെ കഥയുണ്ട്. തമിഴ്നാട്ടിലെ നാഗർകോവിൽ സ്വദേശിയായ ഗോപാലകൃഷ്ണനാണ് ഈ കായിക ഇനത്തിന് രൂപം നൽകിയത്. ശാരീരിക പരിമിതികളുള്ള തന്റെ ഇളയ സഹോദരൻ സതീഷിന് സാധാരണ കായിക വിനോദങ്ങളിൽ പങ്കെടുക്കാൻ കഴിയാത്ത സാഹചര്യം മനസ്സിലാക്കിയ ഗോപാലകൃഷ്ണൻ, സഹോദരനും കളിക്കളത്തിന്റെ ഭാഗമാകാൻ കഴിയുന്ന ഒരു പുതിയ ഗെയിം രൂപപ്പെടുത്തുകയായിരുന്നു.
2003-ൽ ‘പവർ ബോൾ’ എന്ന പേരിൽ ആരംഭിച്ച ഈ കായിക വിനോദം പിന്നീട് പരിഷ്കരിക്കുകയും വികസിപ്പിക്കുകയും ചെയ്ത് റോക്കറ്റ് ബോൾ എന്ന പേരിൽ അറിയപ്പെടുകയും ചെയ്തു. ശാരീരിക പരിമിതികളുള്ളവർക്കും കായികരംഗത്ത് അവസരമൊരുക്കുക എന്ന ആശയത്തിൽനിന്ന് ആരംഭിച്ച ഈ സംരംഭം ഇന്ന് രാജ്യാന്തര മത്സരവേദിയിലെത്തിയിരിക്കുന്നു എന്നത് ശ്രദ്ധേയമാണ്. എല്ലാവരെയും ഉൾക്കൊള്ളുന്ന കായിക സംസ്കാരത്തിന്റെ മികച്ച മാതൃക കൂടിയാണ് റോക്കറ്റ് ബോൾ.
ബാസ്കറ്റ്ബോൾ, ഹാൻഡ്ബോൾ തുടങ്ങിയ കായിക ഇനങ്ങളുമായി ചില സാമ്യങ്ങളുള്ള ടീം ഗെയിമാണ് റോക്കറ്റ് ബോൾ. വേഗത, കൃത്യത, കായികക്ഷമത, തന്ത്രപരമായ നീക്കങ്ങൾ, ടീം വർക്ക് എന്നിവയാണ് ഈ കളിയുടെ പ്രധാന സവിശേഷതകൾ. ഒരു ടീമിൽ പത്തുപേരാണ് അംഗങ്ങളായുള്ളത്. ഒരേസമയം അഞ്ചുപേർ വീതമാണ് ഓരോ ടീമിനുവേണ്ടിയും കളിക്കളത്തിലുണ്ടാകുക.
40 മീറ്റർ നീളവും 20 മീറ്റർ വീതിയുമുള്ള കോർട്ടിലാണ് മത്സരം നടക്കുന്നത്. കോർട്ട് രണ്ട് ഭാഗങ്ങളായി വിഭജിച്ചിരിക്കും. ഓരോ അറ്റത്തും ഏകദേശം ഏഴടി ഉയരമുള്ള ഒരു പോസ്റ്റ് സ്ഥാപിക്കും. പോസ്റ്റിന് ചുറ്റും മൂന്ന് അടി ചുറ്റളവിലുള്ള പ്രത്യേക മേഖലയും ഉണ്ടായിരിക്കും.
കളിക്കാർ ഈ വലയത്തിന് പുറത്തുനിന്നാണ് പന്ത് എറിയേണ്ടത്. പന്തെറിയുമ്പോൾ കാലുകൾ ഉയർത്തുകയോ സ്ഥാനം മാറ്റുകയോ ചെയ്യാൻ പാടില്ല. പോസ്റ്റിന്റെ മുകളിലെ ഒന്നര അടി ഭാഗത്തുള്ള വെള്ളനിറത്തിലുള്ള മേഖലയിലാണ് പന്ത് കൃത്യമായി പതിക്കേണ്ടത്. താഴ്ഭാഗം മഞ്ഞനിറത്തിലായിരിക്കും.
പരിമിതമായ സൗകര്യങ്ങൾക്കിടയിലും രാജ്യാന്തര വേദിയിൽ ഇന്ത്യയുടെ യശസ്സുയർത്തിയ മലയാളി താരങ്ങളുടെ നേട്ടം അർഹിക്കുന്ന രീതിയിൽ ആഘോഷിക്കപ്പെടേണ്ടതാണ്. കായികരംഗത്ത് ശ്രദ്ധിക്കപ്പെടുന്ന പരമ്പരാഗത ഇനങ്ങൾക്കപ്പുറം പുതിയ കായിക ഇനങ്ങളിലും കേരളത്തിലെ താരങ്ങൾക്ക് മികവ് തെളിയിക്കാനാകുമെന്ന് ഈ വിജയം വ്യക്തമാക്കുന്നു.
സ്വന്തം പണം ചെലവഴിച്ച് രാജ്യത്തിനുവേണ്ടി മത്സരിച്ച താരങ്ങൾക്ക് സാമ്പത്തിക സഹായവും ഔദ്യോഗിക അംഗീകാരവും തുടർപരിശീലനത്തിനുള്ള സൗകര്യങ്ങളും ലഭിക്കേണ്ടത് കാലഘട്ടത്തിന്റെ ആവശ്യമാണ്.



