അവശേഷിച്ച 8 കേന്ദ്രങ്ങളും സർക്കാർ എൽ.പി സ്കൂളുകളായി
തിരുവനന്തപുരം: സംസ്ഥാനത്തെ ഏകാധ്യാപക വിദ്യാലയങ്ങളുടെ കാലഘട്ടത്തിന് അവസാനമായി. സംസ്ഥാനത്ത് അവശേഷിച്ചിരുന്ന എട്ട് മൾട്ടി ഗ്രേഡ് ലേണിങ് സെന്ററുകൾ (MGLC) സർക്കാർ ലോവർ പ്രൈമറി (എൽ.പി) സ്കൂളുകളായി ഉയർത്തി. പൊതുവിദ്യാഭ്യാസ വകുപ്പിന്റെ ഉത്തരവിനെ തുടർന്നാണ് നടപടി. സംസ്ഥാന സർക്കാരിന്റെ 100 ദിന കർമ്മപരിപാടിയുടെ ഭാഗമായാണ് എട്ട് കേന്ദ്രങ്ങളെയും ഔപചാരികമായി എൽ.പി സ്കൂളുകളാക്കി മാറ്റിയത്.
പൊതുവിദ്യാഭ്യാസ വകുപ്പ് മന്ത്രി എൻ. ഷംസുദ്ദീന്റെ നിർദേശത്തെ തുടർന്നാണ് നടപടി. മലപ്പുറം ജില്ലയിലെ അഞ്ച് കേന്ദ്രങ്ങളും കാസർകോട്, ഇടുക്കി, കണ്ണൂർ ജില്ലകളിലെ ഓരോ കേന്ദ്രവുമാണ് പുതിയ സർക്കാർ എൽ.പി സ്കൂളുകളായി മാറിയത്.
എട്ട് കേന്ദ്രങ്ങൾ ഏതെല്ലാം?
പുതിയതായി സർക്കാർ എൽ.പി സ്കൂളുകളായി ഉയർത്തിയ MGLCകളുടെ പട്ടിക:
- മേൽമുറി MGLC – കിഴിശ്ശേരി ഉപജില്ല, മലപ്പുറം
- അരിമംഗലം MGLC – അരീക്കോട് ഉപജില്ല, മലപ്പുറം
- കാളന്തിരുത്തി MGLC – താനൂർ ഉപജില്ല, മലപ്പുറം
- അരിമണൽ MGLC – വണ്ടൂർ ഉപജില്ല, മലപ്പുറം
- തരികുളം MGLC – മഞ്ചേരി ഉപജില്ല, മലപ്പുറം
- ആലൂർ MGLC – കാസർകോട് ഉപജില്ല, കാസർകോട്
- കുറത്തിക്കുടി MGLC – അടിമാലി ഉപജില്ല, ഇടുക്കി
- കാലാങ്കി MGLC – ഇരിക്കൂർ ഉപജില്ല, കണ്ണൂർ.
ഇനി ഏകാധ്യാപക വിദ്യാലയങ്ങളില്ല
വിദ്യാർഥികളുടെ എണ്ണം കുറവായതിനാലും ഏറെ പിന്നാക്കവും ഒറ്റപ്പെട്ടതുമായ പ്രദേശങ്ങളിലെ കുട്ടികൾക്ക് അടിസ്ഥാന വിദ്യാഭ്യാസം ഉറപ്പാക്കുന്നതിനുമായി പ്രവർത്തിച്ചിരുന്ന MGLC സംവിധാനമാണ് ഇപ്പോൾ പൂർണമായും എൽ.പി സ്കൂൾ സംവിധാനത്തിലേക്ക് മാറുന്നത്.
2026 സെപ്റ്റംബർ 17ന് പൊതുവിദ്യാഭ്യാസ വകുപ്പ് പുറപ്പെടുവിച്ച സർക്കാർ ഉത്തരവിലാണ് എട്ട് MGLCകളെയും എൽ.പി സ്കൂളുകളായി അപ്ഗ്രേഡ് ചെയ്യാനുള്ള തീരുമാനം വ്യക്തമാക്കിയത്. പൊതുവിദ്യാഭ്യാസ വകുപ്പിന്റെ ഔദ്യോഗിക വെബ്സൈറ്റിലും ഇതുസംബന്ധിച്ച ഉത്തരവ് പ്രസിദ്ധീകരിച്ചിട്ടുണ്ട്.
ഒക്ടോബർ രണ്ടിന് മലപ്പുറം കിഴിശ്ശേരി ഉപജില്ലയിലെ മേൽമുറി MGLCയിൽ നടന്ന ചടങ്ങിൽ സംസ്ഥാനതല ഉദ്ഘാടനം വിദ്യാഭ്യാസ മന്ത്രി എൻ. ഷംസുദ്ദീൻ നിർവഹിച്ചു. ഇതോടെ സംസ്ഥാനത്തെ ഏകാധ്യാപക വിദ്യാലയങ്ങൾ എന്നറിയപ്പെട്ടിരുന്ന അവസാന എട്ട് കേന്ദ്രങ്ങളും സാധാരണ സർക്കാർ പ്രാഥമിക വിദ്യാലയ സംവിധാനത്തിന്റെ ഭാഗമാകുകയായിരുന്നു.
കേരളത്തിലെ MGLC സംവിധാനം രൂപംകൊണ്ടത് ഒറ്റപ്പെട്ടതും വിദ്യാഭ്യാസ സൗകര്യങ്ങൾ പരിമിതവുമായ പ്രദേശങ്ങളിലെ കുട്ടികളെ സ്കൂൾ വിദ്യാഭ്യാസത്തിന്റെ പരിധിയിൽ കൊണ്ടുവരുന്നതിനാണ്.
1990കളിൽ ആരംഭിച്ച ഈ സംവിധാനത്തിൽ ഒരു അധ്യാപകൻ തന്നെ വിവിധ ക്ലാസുകളിലെ കുട്ടികളെ ഒരുമിച്ച് പഠിപ്പിക്കുന്ന രീതിയായിരുന്നു പ്രധാനമായും ഉണ്ടായിരുന്നത്. ആദിവാസി-ഗോത്ര മേഖലകൾ, തീരദേശ പ്രദേശങ്ങൾ, മലമ്പ്രദേശങ്ങൾ തുടങ്ങിയ ഇടങ്ങളിലെ സാമൂഹികമായും സാമ്പത്തികമായും പിന്നാക്കം നിൽക്കുന്ന കുടുംബങ്ങളിലെ കുട്ടികൾക്ക് പ്രാഥമിക വിദ്യാഭ്യാസം ലഭ്യമാക്കുന്നതിൽ MGLCകൾ നിർണായക പങ്കുവഹിച്ചു.
