മോഷണത്തിലേക്കുള്ള നിയന്ത്രിക്കാനാകാത്ത പ്രേരണ എന്താണ്?
ഇംഗ്ലീഷ് ഭാഷയിലെ ഇന്നത്തെ ശ്രദ്ധേയമായ വാക്കായി ‘Kleptomania’. സാധാരണയായി മോഷണം എന്ന ആശയവുമായി ബന്ധപ്പെടുത്തി ഉപയോഗിക്കുന്ന ഈ പദത്തിന് പിന്നിൽ ഒരു മാനസികാരോഗ്യ അവസ്ഥയുണ്ട്. ആവർത്തിച്ച് മോഷ്ടിക്കാനുള്ള നിയന്ത്രിക്കാനാകാത്ത പ്രേരണ അനുഭവപ്പെടുന്ന ഒരു മാനസികാരോഗ്യ അവസ്ഥയായ ഇത് സാധാരണ മോഷണത്തിൽനിന്ന് വ്യത്യസ്തമാണ്. സാമ്പത്തിക നേട്ടത്തിനോ വ്യക്തിപരമായ ആവശ്യത്തിനോ വേണ്ടിയല്ല പലപ്പോഴും ഇത്തരം മോഷണം നടക്കുന്നത്.
മോഷ്ടിക്കുന്ന വസ്തുവിന് വലിയ വിലയില്ലാതിരിക്കാം. അത് വാങ്ങാനുള്ള സാമ്പത്തിക ശേഷിയും വ്യക്തിക്കുണ്ടാകാം. എന്നിരുന്നാലും മോഷ്ടിക്കാനുള്ള ശക്തമായ പ്രേരണയെ ചെറുക്കാൻ കഴിയാത്ത അവസ്ഥയാണ് ഇവിടെ പ്രധാനമായി കാണുന്നത്.
ക്ലെപ്റ്റോമാനിയയുമായി ബന്ധപ്പെട്ട സംഭവങ്ങൾക്ക് ചില പ്രത്യേക ഘട്ടങ്ങൾ ഉണ്ടാകാം.മോഷണത്തിന് മുമ്പ് വ്യക്തിയിൽ ഉത്കണ്ഠ, മാനസിക സമ്മർദം അല്ലെങ്കിൽ ഉള്ളിലെ പിരിമുറുക്ക് വർധിക്കാം. മോഷണം നടത്തിയതിന് പിന്നാലെ താൽക്കാലികമായി ആശ്വാസമോ സംതൃപ്തിയോ ലഭിക്കുന്നതായി അനുഭവപ്പെടാം. എന്നാൽ പിന്നീട് കുറ്റബോധം, ലജ്ജ, പശ്ചാത്താപം തുടങ്ങിയ വികാരങ്ങൾ ഉണ്ടാകാനും സാധ്യതയുണ്ട്. ഈ ചക്രം വീണ്ടും ആവർത്തിക്കുമ്പോഴാണ് പ്രശ്നം കൂടുതൽ സങ്കീർണമാകുന്നത്.
ക്ലെപ്റ്റോമാനിയയെക്കുറിച്ചുള്ള പ്രധാന തെറ്റിദ്ധാരണകളിലൊന്ന് ഇതിനെ സാധാരണ മോഷണവുമായി തുല്യപ്പെടുത്തുന്നതാണ്.സാധാരണ മോഷണത്തിൽ സാമ്പത്തിക നേട്ടം, വസ്തുവിന്റെ ഉപയോഗം, പ്രതികാരം തുടങ്ങിയ ലക്ഷ്യങ്ങൾ ഉണ്ടാകാം. എന്നാൽ ക്ലെപ്റ്റോമാനിയയിൽ മോഷ്ടിക്കുന്ന വസ്തുവിന്റെ മൂല്യം പലപ്പോഴും പ്രധാന കാര്യമല്ല. മോഷണം മുൻകൂട്ടി ആസൂത്രണം ചെയ്തതല്ലാത്തതും ഒറ്റയ്ക്കാണ് സംഭവിക്കുന്നതും സാധാരണയായി കാണപ്പെടുന്നു.
ക്ലെപ്റ്റോമാനിയ സ്ഥിരീകരിക്കാൻ പ്രത്യേകമായി ഒരു രക്തപരിശോധനയോ സ്കാനിംഗോ ഇല്ല. വ്യക്തിയുടെ പെരുമാറ്റരീതി, മോഷ്ടിക്കാനുള്ള പ്രേരണ, മോഷണത്തിന് മുമ്പും ശേഷവുമുള്ള വികാരങ്ങൾ, മറ്റ് മാനസികാരോഗ്യ അവസ്ഥകൾ എന്നിവ വിലയിരുത്തിയാണ് വിദഗ്ധർ രോഗനിർണയത്തിലേക്ക് എത്തുന്നത്.
