ഫ്രാൻസിൽ വൻ കാട്ടുതീ: മൂവായിരത്തോളം ആളുകളെ ഒഴിപ്പിച്ചു; വിനോദസഞ്ചാര കേന്ദ്രങ്ങൾ കടുത്ത ഭീതിയിൽ
പാരീസ്: കടുത്ത ചൂടിന് പിന്നാലെ ദക്ഷിണ ഫ്രാൻസിൽ വൻ കാട്ടുതീ പടരുന്നു. ജനവാസ മേഖലകളിലേക്കും വിനോദസഞ്ചാര കേന്ദ്രങ്ങളിലേക്കും തീ പടർന്നതിനെ തുടർന്ന് മൂവായിരത്തോളം ആളുകളെ അടിയന്തരമായി സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചു. സെന്റ് മേരി ലാ മെർ (Sainte-Marie-la-Mer), കാനെറ്റ് എൻ റൂസിലോൺ (Canet-en-Roussillon) എന്നീ തീരദേശ നഗരങ്ങൾക്ക് സമീപമാണ് കാട്ടുതീ കടുത്ത നാശം വിതയ്ക്കുന്നത്.
അഗ്നിശമന സേനാംഗങ്ങളും ഹെലികോപ്റ്ററുകളും ഉൾപ്പെടെയുള്ള വൻ സന്നാഹമാണ് തീയണയ്ക്കാനായി രംഗത്തുള്ളത്. ഒഴിപ്പിച്ചു മാറ്റിയവരിൽ പകുതിയിലധികം പേരും മേഖലയിലെ മൂന്ന് പ്രമുഖ ക്യാമ്പിംഗ് സൈറ്റുകളിൽ എത്തിയ വിനോദസഞ്ചാരകളാണെന്ന് അധികൃതർ വ്യക്തമാക്കി.
രക്ഷാപ്രവർത്തനം ഊർജിതം
രക്ഷാപ്രവർത്തനത്തിനിടെ രണ്ട് അഗ്നിശമന സേനാംഗങ്ങൾക്ക് നിസ്സാര പരിക്കേറ്റിട്ടുണ്ട്. നിലവിൽ ഇരുനൂറോളം ഫയർഫോഴ്സ് ജീവനക്കാരും വെള്ളം കോരി ഒഴിക്കുന്ന നാല് പ്രത്യേക വിമാനങ്ങളും സ്ഥലത്ത് ക്യാമ്പ് ചെയ്ത് തീയണയ്ക്കാനുള്ള ശ്രമങ്ങൾ തുടരുകയാണ്. കൂടാതെ പ്രാദേശിക സന്നദ്ധ പ്രവർത്തകരുടെ ഒരു വലിയ ശൃംഖലയും രക്ഷാപ്രവർത്തനത്തിനായി രംഗത്തുണ്ടെന്ന് പൈറനീസ് ഓറിയന്റലിസ് മേഖലയിലെ ഉയർന്ന ഉദ്യോഗസ്ഥനായ പിയറി റെഗ്നോൾട്ട് ഡി ലാ മോത്തെ അറിയിച്ചു.
”ബുധനാഴ്ച മുതൽ രാജ്യത്തുടനീളം കാട്ടുതീ പ്രതിരോധിക്കാൻ 1,200 ഓളം അഗ്നിശമന സേനാംഗങ്ങളെ സജ്ജമാക്കിയിട്ടുണ്ട്. നിലവിലെ കാലാവസ്ഥാ സാഹചര്യങ്ങൾ തീ പൂർണ്ണമായും നിയന്ത്രണവിധേയമാക്കാൻ വെല്ലുവിളി ഉയർത്തുന്നുണ്ട്.”
– ലോറന്റ് നുനെസ് (ആഭ്യന്തര മന്ത്രി, ഫ്രാൻസ്)
റെക്കോർഡ് ചൂടും ആഗോള ആശങ്കയും
കഴിഞ്ഞ ജൂൺ മാസത്തിൽ ഫ്രാൻസിൽ അനുഭവപ്പെട്ട 11 ദിവസം നീണ്ടുനിന്ന റെക്കോർഡ് ചൂടാണ് ഇപ്പോഴത്തെ കാട്ടുതീക്ക് പ്രധാന കാരണം. പലയിടങ്ങളിലും താപനില 40 ഡിഗ്രി സെൽഷ്യസിനും മുകളിലായിരുന്നു. ഈ അസാധാരണ ഉഷ്ണതരംഗം മനുഷ്യന്റെ ആരോഗ്യത്തെയും കാർഷിക മേഖലയെയും അടിസ്ഥാന സൗകര്യങ്ങളെയും ബാധിച്ചതിനൊപ്പം കാട്ടുതീ പടരാനുള്ള സാധ്യത വർദ്ധിപ്പിച്ചതായും ലോക കാലാവസ്ഥാ സംഘടന (WMO) കഴിഞ്ഞ ആഴ്ച മുന്നറിയിപ്പ് നൽകിയിരുന്നു.
വരുന്ന ആഴ്ചയിൽ രാജ്യത്ത് വീണ്ടും താപനില ഉയരുമെന്നാണ് മെറ്റിയോ ഫ്രാൻസ് (Meteo-France) കാലാവസ്ഥാ ഏജൻസിയുടെ പ്രവചനം. എന്നാൽ ഇത് ജൂണിലെ അത്രയും തീവ്രമാകാൻ സാധ്യതയില്ലെന്നാണ് വിലയിരുത്തൽ.
