കോംഗോ: കോംഗോയുടെ കിഴക്കൻ ഭാഗത്ത് പടരുന്ന എബോള വൈറസ് ബാധ നിയന്ത്രിക്കുന്നതിനിടയിൽ ശമ്പളവും ആനുകൂല്യങ്ങളും ലഭിക്കാത്തതിൽ പ്രതിഷേധിച്ച് മുൻനിര ആരോഗ്യപ്രവർത്തകർ സമരത്തിലേക്ക്. ഇതോടെ രോഗപ്രതിരോധ പ്രവർത്തനങ്ങൾ കൂടുതൽ പ്രതിസന്ധിയിലാകുമെന്ന ആശങ്ക ഉയർന്നിരിക്കുകയാണ്.
ഏറ്റവും കൂടുതൽ രോഗബാധ റിപ്പോർട്ട് ചെയ്ത ഇറ്റുറി പ്രവിശ്യയിലെ ആരോഗ്യപ്രവർത്തകർ, മേയ് 15-ന് എബോള പൊട്ടിപ്പുറപ്പെട്ടതായി പ്രഖ്യാപിച്ചതിന് ശേഷം ശമ്പളവും ബോണസും ലഭിച്ചിട്ടില്ലെന്ന് ആരോപിച്ചു. മതിയായ സുരക്ഷാ ഉപകരണങ്ങളുടെ അഭാവവും അധികൃതരിൽ നിന്ന് നീതിപൂർവമായ പരിഗണന ലഭിക്കുന്നില്ലെന്ന പരാതിയും ഇവർ ഉന്നയിച്ചു.
സർക്കാർ പുറത്തുവിട്ട ഏറ്റവും പുതിയ കണക്കുകൾ പ്രകാരം ഇതുവരെ 1,708 എബോള കേസുകളും 580 മരണങ്ങളും രേഖപ്പെടുത്തിയിട്ടുണ്ട്. നിലവിലെ എബോള വ്യാപനത്തിന് കാരണമായ ബുണ്ടിബുഗ്യോ വൈറസിനെ പ്രതിരോധിക്കുന്ന ചികിത്സാ പരീക്ഷണങ്ങൾ ആരംഭിക്കുന്ന ഘട്ടത്തിലാണ് സമരം ശക്തമായിരിക്കുന്നത്.
World Health Organization-യുടെ കോംഗോ പ്രതിനിധി, വൈറസ് ജനങ്ങളുടെ സഞ്ചാരവും സുരക്ഷാ പ്രശ്നങ്ങളും മൂലം ഇപ്പോഴും അതിവേഗം വ്യാപിക്കുന്നുണ്ടെന്നും ചികിത്സാ കേന്ദ്രങ്ങളിൽ പലതും നിറഞ്ഞ അവസ്ഥയിലാണെന്നും വ്യക്തമാക്കി.
ബുനിയ വിമാനത്താവളം അടച്ചിട്ടിരിക്കുന്നതിനാൽ ധനസഹായ വിതരണത്തിൽ തടസ്സം നേരിടുന്നതാണ് ശമ്പള വിതരണം വൈകാൻ കാരണങ്ങളിലൊന്നെന്ന് കോംഗോയുടെ ദേശീയ പൊതുജനാരോഗ്യ ഇൻസ്റ്റിറ്റ്യൂട്ടിലെ അധികൃതർ അറിയിച്ചു.
ഇതിനിടെ, ചില ആരോഗ്യപ്രവർത്തകർ ബുനിയയിലെ റ്വാംപാര എബോള ചികിത്സാ കേന്ദ്രത്തിന് മുന്നിൽ പ്രതിഷേധം സംഘടിപ്പിച്ചു. ടയറുകൾ കത്തിച്ച് പ്രതിഷേധിച്ചതിനെ തുടർന്ന് പ്രദേശത്ത് നേരിയ സംഘർഷാവസ്ഥ ഉണ്ടായെങ്കിലും പൊലീസ് ഇടപെട്ട് സ്ഥിതിഗതികൾ നിയന്ത്രണവിധേയമാക്കി.
രോഗബാധിതരെ കണ്ടെത്തൽ, ബോധവൽക്കരണം, സുരക്ഷാ പ്രവർത്തനങ്ങൾ, എബോള ബാധിച്ച് മരിച്ചവരുടെ സംസ്കാരച്ചടങ്ങുകൾ എന്നിവയിൽ ഏർപ്പെട്ടിരിക്കുന്ന ജീവനക്കാരും സമരത്തിൽ പങ്കാളികളാണ്. ശമ്പളം ലഭിക്കാത്തതിനാൽ ജീവൻ പണയം വെച്ച് ജോലി തുടരാനാകില്ലെന്നാണ് അവരുടെ നിലപാട്.
അതേസമയം, സമരം രോഗപ്രതിരോധ പ്രവർത്തനങ്ങളെ ബാധിക്കുമോയെന്ന ആശങ്ക പ്രാദേശിക ജനങ്ങളും പ്രകടിപ്പിച്ചു. ആരോഗ്യപ്രവർത്തകരുടെ ആവശ്യങ്ങൾ എത്രയും വേഗം പരിഹരിച്ച് എബോള നിയന്ത്രണ പ്രവർത്തനങ്ങൾ തടസ്സമില്ലാതെ മുന്നോട്ടുകൊണ്ടുപോകണമെന്ന് പ്രദേശവാസികൾ സർക്കാരിനോട് ആവശ്യപ്പെട്ടു.
