തകർച്ചയുടെ വക്കിൽ യുഎൻ പലസ്തീൻ അഭയാർത്ഥി ഏജൻസി; 100 മില്യൺ ഡോളറിന്റെ കടുത്ത സാമ്പത്തിക പ്രതിസന്ധി എന്ന് ഗുട്ടെറസ്
ഐക്യരാഷ്ട്രസഭ:
പലസ്തീൻ അഭയാർത്ഥികൾക്ക് ആശ്വാസമേകുന്ന യുഎൻ റിലീഫ് ഏജൻസി (UNRWA) ചരിത്രത്തിലെ ഏറ്റവും കടുത്ത നിലനിൽപ്പ് പ്രതിസന്ധി നേരിടുന്നതായി യുഎൻ മേധാവി അന്തോണിയോ ഗുട്ടെറസ് വെളിപ്പെടുത്തി. കടുത്ത ചെലവുചുരുക്കൽ നടപടികൾക്കും പ്രതിസന്ധികൾക്കും ശേഷം ഏജൻസി ഇപ്പോൾ പൂർണ്ണമായും തകർച്ചയുടെ വക്കിലാണെന്ന് (Breaking Point) അദ്ദേഹം മുന്നറിയിപ്പ് നൽകി. ഏജൻസിയുടെ പ്രവർത്തനം സുഗമമായി മുന്നോട്ട് കൊണ്ടുപോകാൻ അടിയന്തരമായി 100 മില്യൺ ഡോളറിന്റെ (ഏകദേശം 830 കോടിയിലധികം രൂപ) സാമ്പത്തിക സഹായം വേണമെന്ന് അദ്ദേഹം അംഗരാജ്യങ്ങളോട് ആവശ്യപ്പെട്ടു.
26 ലക്ഷം പലസ്തീനികളുടെ ഭാവി പ്രതിസന്ധിയിൽ
ഗാസ, വെസ്റ്റ് ബാങ്ക്, ലെബനൻ, ജോർദാൻ, സിറിയ എന്നിവിടങ്ങളിലായി 26 ലക്ഷത്തിലധികം പലസ്തീൻ അഭയാർത്ഥികൾക്ക് ആഹാരം, പാർപ്പിടം, വിദ്യാഭ്യാസം, ചികിത്സ എന്നിവ നൽകുന്നത് UNRWA ആണ്. എന്നാൽ പ്രധാന ദാതാക്കളായ അമേരിക്ക ഉൾപ്പെടെയുള്ള രാജ്യങ്ങൾ ഫണ്ട് വെട്ടിക്കുറച്ചതാണ് ഏജൻസിയെ നിലവിൽ ഈ കടുത്ത ദ്രവ്യത പ്രതിസന്ധിയിലേക്ക് (Liquidity Crisis) തള്ളിവിട്ടത്.
ഏജൻസിയെ തകർക്കാൻ ബോധപൂർവ്വമായ വ്യാജപ്രചാരണങ്ങളും നയതന്ത്ര തടസ്സങ്ങളും ഉണ്ടാകുന്നുണ്ടെന്നും, 2023 ഒക്ടോബറിന് ശേഷം ഗാസയിൽ മാത്രം 390 യുഎൻ ജീവനക്കാർ കൊല്ലപ്പെട്ടിട്ടുണ്ടെന്നും ഗുട്ടെറസ് ചൂണ്ടിക്കാട്ടി. ഫണ്ട് ഇല്ലാത്തതിനാൽ ഇതിനകം തന്നെ ജീവനക്കാരുടെ ശമ്പളം വെട്ടിക്കുറയ്ക്കുകയും പ്രവർത്തന സമയം 20 ശതമാനമായി കുറയ്ക്കുകയും ചെയ്തിട്ടുണ്ട്. ഇനിയും സഹായം ലഭിച്ചില്ലെങ്കിൽ ഈ ദുരിതാശ്വാസ പ്രവർത്തനങ്ങൾ പൂർണ്ണമായും നിലയ്ക്കുമെന്നാണ് യുഎൻ വ്യക്തമാക്കുന്നത്.
