15-ാം വയസിൽ ക്യാപ്റ്റൻ പദവി

Sunitha Nair
2 Min Read

ഇൻഡോർ: ഇന്ത്യൻ ക്രിക്കറ്റിലെ കൗമാര വിസ്മയം വൈഭവ് സൂര്യവംശി വീണ്ടും റെക്കോർഡ് പുസ്തകത്തിൽ. വെറും 15-ാം വയസിൽ പുരുഷ ടി20 ക്രിക്കറ്റ് ചരിത്രത്തിലെ ഏറ്റവും പ്രായം കുറഞ്ഞ ക്യാപ്റ്റനെന്ന അപൂർവ നേട്ടമാണ് ഈ ഇടംകൈ ബാറ്റർ സ്വന്തമാക്കിയത്. സയ്യിദ് മുഷ്താഖ് അലി ട്രോഫി 2026-27 സീസണിൽ ബിഹാർ ടീമിനെ നയിക്കാനുള്ള അവസരം ലഭിച്ചതോടെയാണ് വൈഭവ് പുതിയ ചരിത്രം കുറിച്ചത്.

Ref.No:DPCI-PKD-50

ശനിയാഴ്ച  ഇൻഡോറിലെ ഹോൾക്കർ സ്റ്റേഡിയത്തിൽ സൗരാഷ്ട്രയ്ക്കെതിരായ ബിഹാറിന്റെ ആദ്യ മത്സരത്തിലാണ് വൈഭവ് ക്യാപ്റ്റനായി അരങ്ങേറ്റം കുറിച്ചത്. ടോസ് സമയത്ത് ടീമിനെ നയിക്കാൻ ഗ്രൗണ്ടിലെത്തിയതോടെയാണ് പുരുഷ ടി20 ക്രിക്കറ്റിലെ ഏറ്റവും പ്രായം കുറഞ്ഞ നായകനെന്ന റെക്കോർഡ് അദ്ദേഹത്തിന്റെ പേരിലായത്. 15 വയസും 232 ദിവസവുമായിരുന്നു അന്ന് താരത്തിന്റെ പ്രായം. ടോസ് നേടിയ ബിഹാർ ആദ്യം ബാറ്റ് ചെയ്യാൻ തീരുമാനിച്ചു.

ഇതിനുമുമ്പ് പുരുഷ ടി20 ക്രിക്കറ്റിലെ ഏറ്റവും പ്രായം കുറഞ്ഞ ക്യാപ്റ്റനെന്ന റെക്കോർഡ് ക്രൊയേഷ്യയുടെ സാക് വുകുസിച്ചിന്റെ പേരിലായിരുന്നു. 2025 ഓഗസ്റ്റ് ഏഴിന് സൈപ്രസിനെതിരായ മത്സരത്തിൽ 17 വയസും 311 ദിവസവും പ്രായമുള്ളപ്പോഴാണ് അദ്ദേഹം ക്രൊയേഷ്യയെ നയിച്ചത്.

ഇപ്പോൾ 15 വയസും 232 ദിവസവും പ്രായത്തിൽ ബിഹാറിന്റെ നായകസ്ഥാനം ഏറ്റെടുത്ത വൈഭവ് ആ റെക്കോർഡ് മറികടന്നിരിക്കുകയാണ്. പാകിസ്ഥാനിലെ ആഭ്യന്തര ടി20 മത്സരത്തിൽ 2009-ൽ ക്വറ്റ ബിയേഴ്സിനെ നയിച്ച തൈമൂർ അലിയും യുവ ക്യാപ്റ്റൻമാരുടെ പട്ടികയിൽ ഇടംപിടിച്ചിട്ടുണ്ട്.

സയ്യിദ് മുഷ്താഖ് അലി ട്രോഫിയിലെ ആദ്യ രണ്ട് മത്സരങ്ങൾക്കുള്ള 17 അംഗ ബിഹാർ ടീമിനെ പ്രഖ്യാപിച്ചപ്പോഴാണ് ക്രിക്കറ്റ് അസോസിയേഷൻ വൈഭവിനെ ക്യാപ്റ്റനായി നിയോഗിച്ചത്. സൂരജ് കശ്യപിനാണ് വൈസ് ക്യാപ്റ്റന്റെ ചുമതല. ബിഹാർ ക്രിക്കറ്റ് അസോസിയേഷന്റെ ഈ തീരുമാനം വൈഭവിന്റെ കഴിവിലും നേതൃത്വസാധ്യതയിലുമുള്ള വിശ്വാസം വ്യക്തമാക്കുന്നതാണ്. ഇതാദ്യമായാണ് താരം ബിഹാറിന്റെ സീനിയർ ടീമിനെ നയിക്കുന്നത്.

കഴിഞ്ഞ കുറച്ചുകാലമായി ഇന്ത്യൻ ക്രിക്കറ്റിൽ വലിയ ചർച്ചാവിഷയമാണ് വൈഭവ് സൂര്യവംശി. ഐപിഎല്ലിൽ രാജസ്ഥാൻ റോയൽസിനായി നടത്തിയ വെടിക്കെട്ട് പ്രകടനങ്ങളിലൂടെയാണ് താരം ദേശീയ ശ്രദ്ധ നേടിയത്. ഐപിഎൽ 2025-ൽ ഗുജറാത്ത് ടൈറ്റൻസിനെതിരെ വെറും 35 പന്തിൽ സെഞ്ചുറി നേടിയതോടെ ടി20 ക്രിക്കറ്റിലെ ഏറ്റവും പ്രായം കുറഞ്ഞ സെഞ്ചുറിക്കാരനെന്ന റെക്കോർഡും വൈഭവിന്റെ പേരിലായി.

15-ാം വയസിൽ ദേശീയ ടീമിലും ഐപിഎല്ലിലും ആഭ്യന്തര ക്രിക്കറ്റിലും ശ്രദ്ധേയമായ നേട്ടങ്ങൾ സ്വന്തമാക്കിയ വൈഭവ് സൂര്യവംശിക്ക് പുതിയ ക്യാപ്റ്റൻ പദവി കരിയറിലെ മറ്റൊരു പ്രധാന അധ്യായമാണ്. വ്യക്തിഗത പ്രകടനങ്ങൾക്കൊപ്പം ഒരു ടീമിനെ നയിക്കാനുള്ള ഉത്തരവാദിത്വവും ഇനി താരത്തിന് മുന്നിലുണ്ട്.

Share This Article
Leave a Comment

Leave a Reply

Your email address will not be published. Required fields are marked *

×