റോഡ് സുരക്ഷയ്ക്ക് പുതിയ ദൗത്യം

Alex Sagar
2 Min Read

കൊച്ചി: കേരളത്തിലെ വർധിച്ചുവരുന്ന റോഡപകടങ്ങളും അതുമൂലമുള്ള മരണങ്ങളും കുറയ്ക്കുകയെന്ന ലക്ഷ്യത്തോടെ സംസ്ഥാന സർക്കാർ പുതിയ റോഡ് സുരക്ഷാ പദ്ധതിക്ക് രൂപം നൽകുന്നു. ഇതിന്റെ ഭാഗമായി രൂപീകരിച്ച കേരള സ്റ്റേറ്റ് റോഡ് സേഫ്റ്റി മിഷന്റെ ബ്രാൻഡ് അംബാസഡറായി മലയാളത്തിന്റെ പ്രിയതാരം മമ്മൂട്ടിയെ നിയോഗിച്ചു. ഗതാഗത മന്ത്രി സി.പി. ജോണാണ് ഇക്കാര്യം അറിയിച്ചത്.

Ref.No:DPCI-PKD-50

കേരള സ്റ്റേറ്റ് റോഡ് സേഫ്റ്റി മിഷന്റെ ഔദ്യോഗിക പ്രഖ്യാപനം നവംബർ 15ന് രാവിലെ 11 മണിക്ക് എറണാകുളം ടൗൺഹാളിൽ നടക്കും.  മുഖ്യമന്ത്രി വി.ഡി. സതീശൻ മിഷന്റെ ചെയർമാനായിരിക്കും. ഗതാഗത മന്ത്രി കോ-ചെയർമാനായും എട്ട് വകുപ്പുകളിലെ മന്ത്രിമാർ അംഗങ്ങളായും പ്രവർത്തിക്കും. വിവിധ സർക്കാർ വകുപ്പുകളെ ഏകോപിപ്പിച്ചുകൊണ്ട് റോഡ് സുരക്ഷാ പ്രവർത്തനങ്ങൾ കൂടുതൽ ഫലപ്രദമായി നടപ്പാക്കുകയാണ് ലക്ഷ്യം.

‘Enlighten and Enforce’ എന്ന ആശയത്തെ അടിസ്ഥാനമാക്കിയാണ് മിഷന്റെ പ്രവർത്തനങ്ങൾ ആസൂത്രണം ചെയ്യുന്നത്. റോഡ് സുരക്ഷയെക്കുറിച്ച് ജനങ്ങളിൽ അവബോധം സൃഷ്ടിക്കുന്നതിനൊപ്പം ഗതാഗതനിയമങ്ങൾ കർശനമായി നടപ്പാക്കുകയും ചെയ്യും.

വിദ്യാർഥികൾ മുതൽ മുതിർന്ന പൗരന്മാർ വരെയുള്ള എല്ലാ വിഭാഗങ്ങളെയും ഉൾപ്പെടുത്തി വിപുലമായ ബോധവത്കരണ പരിപാടികൾ സംഘടിപ്പിക്കും. റോഡിലൂടെ സഞ്ചരിക്കുന്ന ഓരോ വ്യക്തിക്കും സ്വന്തം സുരക്ഷയോടൊപ്പം മറ്റുള്ളവരുടെ സുരക്ഷയിലും ഉത്തരവാദിത്തമുണ്ടെന്ന സന്ദേശം ജനങ്ങളിലെത്തിക്കുകയാണ് പ്രധാന ലക്ഷ്യം.

ഹെൽമറ്റ്, സീറ്റ് ബെൽറ്റ് എന്നിവയുടെ ഉപയോഗം, അമിതവേഗം ഒഴിവാക്കൽ, മദ്യപിച്ച് വാഹനമോടിക്കുന്നതിന്റെ അപകടങ്ങൾ, മൊബൈൽ ഫോൺ ഉപയോഗിച്ചുള്ള ഡ്രൈവിങ്, കാൽനടയാത്രക്കാരുടെ സുരക്ഷ തുടങ്ങിയ വിഷയങ്ങളിൽ പ്രത്യേക ബോധവത്കരണവും നടത്തും.

റോഡ് സുരക്ഷാ പ്രവർത്തനങ്ങൾ സംസ്ഥാനതലത്തിൽ മാത്രം ഒതുക്കാതെ ജില്ലകളിലേക്കും തദ്ദേശസ്വയംഭരണ സ്ഥാപനങ്ങളിലേക്കും വ്യാപിപ്പിക്കും. ഇതിന്റെ ഭാഗമായി പ്രാദേശിക തലങ്ങളിൽ സേഫ് ഡ്രൈവിങ് ക്ലബ്ബുകൾ രൂപീകരിക്കും.

റോഡപകടങ്ങൾ പതിവായി സംഭവിക്കുന്ന സ്ഥലങ്ങൾ അഥവാ ബ്ലാക്ക് സ്പോട്ടുകൾ കണ്ടെത്തി ആവശ്യമായ സുരക്ഷാ ക്രമീകരണങ്ങൾ ഏർപ്പെടുത്തും.

ഇതിന്റെ ഭാഗമായി:

  • അപകടസാധ്യതയുള്ള റോഡുകളുടെ നവീകരണം.
  • കേടായതും വ്യക്തതയില്ലാത്തതുമായ ട്രാഫിക് സൈൻ ബോർഡുകളുടെ അറ്റകുറ്റപ്പണി.
  • കാൽനടയാത്രക്കാർക്കുള്ള സീബ്രാ ക്രോസിങ്ങുകളുടെ വീതി വർധിപ്പിക്കൽ.
  • റോഡ് മാർക്കിങ്ങിൽ പ്രത്യേക കളർ കോഡുകൾ ഉൾപ്പെടുത്തൽ.
  • സ്കൂളുകൾ, ആശുപത്രികൾ, ആരാധനാലയങ്ങൾ തുടങ്ങിയ ഇടങ്ങളിൽ പ്രത്യേക സുരക്ഷാ മേഖലകൾ സജ്ജമാക്കൽ.

എന്നിവയ്ക്ക് പ്രാധാന്യം നൽകും.

കുട്ടികളിൽ ചെറുപ്പം മുതൽ തന്നെ സുരക്ഷിതമായ റോഡ് ഉപയോഗ ശീലങ്ങൾ വളർത്തിയെടുക്കുന്നതിനായി സ്കൂൾ പാഠ്യപദ്ധതിയിൽ റോഡ് സുരക്ഷ ഉൾപ്പെടുത്താനും സർക്കാർ ആലോചിക്കുന്നു.

റോഡ് സുരക്ഷാ പ്രവർത്തനങ്ങൾ കൂടുതൽ ജനകീയമാക്കുന്നതിനായി പ്രത്യേക വെബ്സൈറ്റും മൊബൈൽ ആപ്ലിക്കേഷനും വികസിപ്പിക്കാനും പദ്ധതിയുണ്ട്. റോഡുകളിലെ സുരക്ഷാ പ്രശ്നങ്ങൾ, അപകടസാധ്യതയുള്ള സ്ഥലങ്ങൾ തുടങ്ങിയവ സംബന്ധിച്ച നിർദേശങ്ങളും വിവരങ്ങളും പൊതുജനങ്ങളിൽ നിന്ന് സ്വീകരിക്കുന്നതിനുള്ള സംവിധാനവും പരിഗണനയിലുണ്ട്.

മലയാള സിനിമയിലെ ജനപ്രിയ താരവും സമൂഹത്തിൽ വലിയ സ്വാധീനമുള്ള വ്യക്തിത്വവുമായ മമ്മൂട്ടിയെ ബ്രാൻഡ് അംബാസഡറായി നിയോഗിച്ചത് റോഡ് സുരക്ഷാ സന്ദേശം കൂടുതൽ ജനങ്ങളിലേക്ക് എത്തിക്കാൻ സഹായിക്കുമെന്നാണ് പ്രതീക്ഷ.

റോഡപകടങ്ങൾ കുറയ്ക്കുന്നതിന് സർക്കാർ സംവിധാനങ്ങളുടെ ഇടപെടൽ മാത്രം മതിയാകില്ല. വാഹനമോടിക്കുന്നവർ, കാൽനടയാത്രക്കാർ, വിദ്യാർഥികൾ, പൊതുഗതാഗത സംവിധാനങ്ങൾ ഉപയോഗിക്കുന്നവർ തുടങ്ങി സമൂഹത്തിലെ ഓരോ വ്യക്തിയും ഉത്തരവാദിത്തത്തോടെ പെരുമാറേണ്ടതുണ്ട്.

Share This Article
Leave a Comment

Leave a Reply

Your email address will not be published. Required fields are marked *

×