‘മുറാസു’ ആന്ധ്ര തീരം തൊട്ടു

Alexander Jacob
2 Min Read

ആന്ധ്രാപ്രദേശിലെ പ്രകാശം ജില്ലയിൽ വ്യാപകമായ മുൻകരുതൽ നടപടികൾ; ആയിരക്കണക്കിന് ആളുകളെ സുരക്ഷിത കേന്ദ്രങ്ങളിലേക്ക് മാറ്റി; കേരളത്തിൽ വെള്ളി, ശനി, ഞായർ ദിവസങ്ങളിൽ മഴ ശക്തമാകുമെന്ന് കാലാവസ്ഥാ നിരീക്ഷണ കേന്ദ്രം.

തിരുവനന്തപുരം: ബംഗാൾ ഉൾക്കടലിൽ രൂപംകൊണ്ട അതിതീവ്ര ചുഴലിക്കാറ്റായ ‘മുറാസു’ ആന്ധ്രാപ്രദേശിന്റെ തെക്കൻ തീരം കടന്നതോടെ ദക്ഷിണേന്ത്യൻ സംസ്ഥാനങ്ങളിൽ ജാഗ്രത ശക്തമാക്കി. ചുഴലിക്കാറ്റിന്റെ നേരിട്ടുള്ള ആഘാതം കേരളത്തിൽ പ്രതീക്ഷിക്കുന്നില്ലെങ്കിലും ഇതിന്റെ പരോക്ഷ സ്വാധീനഫലമായി സംസ്ഥാനത്ത് വരുംദിവസങ്ങളിൽ മഴ ശക്തമാകാൻ സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി. അതേസമയം, ആന്ധ്രാപ്രദേശിലെ പ്രകാശം ഉൾപ്പെടെയുള്ള തീരദേശ ജില്ലകളിൽ ശക്തമായ കാറ്റും മഴയും കടൽക്ഷോഭവും കണക്കിലെടുത്ത് വിപുലമായ ദുരന്തനിവാരണ നടപടികളാണ് നടപ്പാക്കുന്നത്.

Ref.No:DPCI-PKD-50

ചൊവ്വാഴ്ച പുലർച്ചെ 3.30നും 5.30നും ഇടയിൽ നെല്ലൂരിനും നരസാപുരത്തിനും ഇടയിൽ ഒംഗോളിന് സമീപത്തുകൂടിയാണ് മുറാസു കരതൊട്ടത്. മണിക്കൂറിൽ 100 മുതൽ 110 കിലോമീറ്റർ വരെ വേഗതയിലുള്ള കാറ്റും മണിക്കൂറിൽ 120 കിലോമീറ്റർ വരെ വേഗതയിൽ വീശിയടിച്ചേക്കാവുന്ന ശക്തമായ കാറ്റുമാണ് കാലാവസ്ഥാ നിരീക്ഷണ കേന്ദ്രം പ്രവചിച്ചിരുന്നത്.

പ്രകാശം, ബാപട്ല, നെല്ലൂർ തുടങ്ങിയ ജില്ലകളിൽ മരങ്ങൾ കടപുഴകി വീഴുകയും താഴ്ന്ന പ്രദേശങ്ങളിൽ വെള്ളം കയറുകയും ചെയ്തു. ചില മേഖലകളിൽ റോഡ് ഗതാഗതത്തിനും വൈദ്യുതി വിതരണത്തിനും തടസ്സങ്ങൾ റിപ്പോർട്ട് ചെയ്തിട്ടുണ്ട്.

ചുഴലിക്കാറ്റിന്റെ ആഘാതം ഏറ്റവും കൂടുതൽ അനുഭവപ്പെടാൻ സാധ്യതയുള്ള പ്രദേശങ്ങളിലൊന്നായ പ്രകാശം ജില്ലയിൽ ഭരണകൂടം അടിയന്തര സുരക്ഷാ നടപടികൾ സ്വീകരിച്ചു. ജില്ലയിലെ ഏഴ് തീരദേശ മണ്ഡലങ്ങളിലായി 26 അപകടസാധ്യതയുള്ള ഗ്രാമങ്ങളും 70ഓളം ജനവാസ കേന്ദ്രങ്ങളും അധികൃതർ തിരിച്ചറിഞ്ഞിരുന്നു. ഈ പ്രദേശങ്ങളിൽ താമസിക്കുന്നവരെ ദുരിതാശ്വാസ ക്യാമ്പുകളിലേക്കും സുരക്ഷിത കേന്ദ്രങ്ങളിലേക്കും മാറ്റുന്നതിനുള്ള നടപടികൾ ആരംഭിച്ചു.

ജില്ലാ കളക്ടർ പി. രാജാബാബുവിന്റെ നേതൃത്വത്തിൽ റവന്യൂ, പൊലീസ്, ദുരന്തനിവാരണ വിഭാഗങ്ങൾ ഏകോപിപ്പിച്ചാണ് പ്രവർത്തനങ്ങൾ നടത്തിയത്. സ്ത്രീകൾ, കുട്ടികൾ, വയോധികർ, ഗർഭിണികൾ തുടങ്ങിയ വിഭാഗങ്ങൾക്ക് പ്രത്യേക പരിഗണന നൽകിയാണ് ഒഴിപ്പിക്കൽ നടപടികൾ നടപ്പാക്കിയത്. പ്രസവ തീയതി അടുത്തിരിക്കുന്ന ഗർഭിണികളെ മുൻകരുതലിന്റെ ഭാഗമായി സമീപത്തെ ആശുപത്രികളിലേക്ക് മാറ്റി.

തീരദേശ മേഖലകളിലെ വിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിക്കുകയും വിവിധ ഗ്രാമങ്ങളിൽ റവന്യൂ, പൊലീസ് ഉദ്യോഗസ്ഥരെ വിന്യസിക്കുകയും ചെയ്തു. ഓരോ മണിക്കൂറിലും പ്രദേശങ്ങളിൽനിന്നുള്ള സ്ഥിതിവിവരങ്ങൾ ശേഖരിച്ച് ജില്ലാ ഭരണകൂടം സ്ഥിതിഗതികൾ വിലയിരുത്തി.

തീരദേശത്തെ വിവിധ തന്ത്രപ്രധാന കേന്ദ്രങ്ങളിലായി രക്ഷാസംഘങ്ങളെ നിയോഗിച്ചിട്ടുണ്ട്. അടിയന്തര സാഹചര്യങ്ങളിൽ ജനങ്ങളെ മാറ്റിപ്പാർപ്പിക്കുന്നതിനും വെള്ളപ്പൊക്കത്തിൽ കുടുങ്ങുന്നവരെ രക്ഷപ്പെടുത്തുന്നതിനും ആവശ്യമായ സജ്ജീകരണങ്ങൾ ഒരുക്കിയിട്ടുണ്ട്.

മുറാസുവിന്റെ സഞ്ചാരപഥം കേരളത്തിലൂടെ കടന്നുപോകുന്നില്ലെങ്കിലും ചുഴലിക്കാറ്റുമായി ബന്ധപ്പെട്ട അന്തരീക്ഷ വ്യതിയാനങ്ങൾ സംസ്ഥാനത്തെ കാലാവസ്ഥയെ സ്വാധീനിക്കുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ വിലയിരുത്തൽ.

കാലാവസ്ഥാ നിരീക്ഷണ കേന്ദ്രത്തിലെ ശാസ്ത്രജ്ഞ നീത കെ. ഗോപാലിന്റെ വിശദീകരണമനുസരിച്ച്, മുറാസു ആന്ധ്ര തീരത്തോട് അടുത്തെത്തുകയും കര കടന്ന് ക്രമേണ ദുർബലമാകുകയും ചെയ്യുന്നതോടെ കേരളത്തിലെ മഴയുടെ തോത് വർധിക്കാൻ സാധ്യതയുണ്ട്.

വെള്ളിയാഴ്ച, ശനിയാഴ്ച, ഞായറാഴ്ച ദിവസങ്ങളിൽ സംസ്ഥാനത്തിന്റെ വിവിധ ഭാഗങ്ങളിൽ വ്യാപകമായ മഴ ലഭിക്കാനിടയുണ്ടെന്നാണ് നിലവിലെ പ്രവചനം. മിക്ക പ്രദേശങ്ങളിലും നേരിയതോ മിതമായതോ ആയ മഴ പ്രതീക്ഷിക്കുമ്പോൾ ഒറ്റപ്പെട്ട ഇടങ്ങളിൽ ശക്തമായ മഴയ്ക്കും സാധ്യതയുണ്ട്.

Share This Article
Leave a Comment

Leave a Reply

Your email address will not be published. Required fields are marked *

×