ന്യൂഡൽഹി: ഒൻപതാം ക്ലാസ് ഗണിതത്തിന്റെ പുതുക്കിയ പാഠ്യപദ്ധതിയിൽ പ്രധാനപ്പെട്ട വിഷയങ്ങൾ ഒഴിവാക്കിയെന്ന തരത്തിൽ ഉയർന്ന ആശങ്കകൾക്ക് വ്യക്തത വരുത്തി നാഷണൽ കൗൺസിൽ ഓഫ് എജുക്കേഷണൽ റിസർച്ച് ആൻഡ് ട്രെയിനിങ് (NCERT). ഒരു വിഷയവും പൂർണമായി ഒഴിവാക്കിയിട്ടില്ലെന്നും ചില ആശയങ്ങൾ പ്രത്യേകം അധ്യായങ്ങളായി നിലനിർത്തുന്നതിന് പകരം മറ്റ് അധ്യായങ്ങളിലേക്ക് ഉൾപ്പെടുത്തിയിരിക്കുകയാണെന്നും NCERT വ്യക്തമാക്കി.
2026–27 അധ്യയനവർഷം ലക്ഷ്യമിട്ട് തയ്യാറാക്കിയ ഒൻപതാം ക്ലാസ് പാഠ്യപദ്ധതിയുമായി ബന്ധപ്പെട്ടാണ് ആശയക്കുഴപ്പം ഉണ്ടായത്. പുതുക്കിയ ഗണിത പാഠപുസ്തകത്തിലും പാഠ്യപദ്ധതിയിലും ചില പരമ്പരാഗത വിഷയങ്ങൾ പ്രത്യേക അധ്യായങ്ങളായി കാണാത്തതിനെ തുടർന്നാണ് അവ ഒഴിവാക്കിയെന്ന ചർച്ചകൾ ഉയർന്നത്. എന്നാൽ, അധ്യായങ്ങളുടെ എണ്ണം നോക്കി മാത്രം ഒരു പാഠ്യപദ്ധതിയുടെ ഉള്ളടക്കം വിലയിരുത്താനാകില്ലെന്നാണ് NCERTയുടെ വിശദീകരണം.
ദേശീയ വിദ്യാഭ്യാസ നയം (NEP) 2020, സ്കൂൾ വിദ്യാഭ്യാസത്തിനായുള്ള നാഷണൽ കരിക്കുലം ഫ്രെയിംവർക്ക് (NCF-SE) 2023 എന്നിവയുടെ അടിസ്ഥാനത്തിലാണ് പുതിയ പാഠ്യപദ്ധതി രൂപകൽപ്പന ചെയ്തിരിക്കുന്നത്. പഠനത്തെ അധ്യായങ്ങളുടെ എണ്ണത്തിലോ പേരുകളിലോ മാത്രം കേന്ദ്രീകരിക്കുന്നതിന് പകരം Curricular Goals, Competencies, Learning Outcomes എന്നിവയെ അടിസ്ഥാനമാക്കിയുള്ള പഠനരീതിക്കാണ് പുതിയ സമീപനത്തിൽ പ്രാധാന്യം നൽകുന്നത്.
NCERTയുടെ നിലപാടനുസരിച്ച്, ഒരു പാഠപുസ്തകത്തിലെ അധ്യായവിഭജനം പഠനത്തെ ക്രമീകരിക്കുന്നതിനുള്ള ഒരു രീതിയാണ്. ഒരു പ്രത്യേക ആശയം പ്രത്യേകം അധ്യായമായി നൽകണമെന്നത് നിർബന്ധമല്ല. അതേ ആശയം മറ്റൊരു അധ്യായത്തിന്റെ ഭാഗമായോ ഒന്നിലധികം അധ്യായങ്ങളിലായോ പഠിപ്പിക്കാം.
അതിനാൽ, ഒൻപതാം ക്ലാസ് ഗണിതത്തിൽ ചില പഴയ അധ്യായങ്ങളുടെ പേരുകളോ ഘടനയോ കാണാതിരുന്നതിനെ മാത്രം അടിസ്ഥാനമാക്കി പ്രധാന വിഷയങ്ങൾ ഒഴിവാക്കിയെന്ന് നിഗമനം ചെയ്യുന്നത് ശരിയല്ലെന്നാണ് NCERTയുടെ വിശദീകരണം. പല ആശയങ്ങളും പുതിയ അധ്യായഘടനയിൽ പരസ്പരം ബന്ധിപ്പിച്ചാണ് അവതരിപ്പിച്ചിരിക്കുന്നത്.
2026–27 അധ്യയനവർഷം മുതൽ ഗണിതപഠനത്തിൽ ആശയധാരണയ്ക്കും പ്രയോഗാധിഷ്ഠിത പഠനത്തിനും കൂടുതൽ പ്രാധാന്യം നൽകുന്ന രീതിയിലേക്കാണ് മാറ്റം നീങ്ങുന്നത്.
