ന്യൂഡൽഹി: ഇ-കൊമേഴ്സ് രംഗത്തെ പ്രമുഖ കമ്പനിയായ ഫ്ലിപ്കാർട്ട് ഓൺലൈൻ ഭക്ഷ്യവിതരണ രംഗത്തേക്കും പ്രവേശിക്കാൻ ഒരുങ്ങുന്നു. വാൾമാർട്ടിന്റെ ഉടമസ്ഥതയിലുള്ള കമ്പനി അടുത്ത ഏതാനും ആഴ്ചകൾക്കകം പുതിയ ഫുഡ് ഡെലിവറി സേവനം ആരംഭിക്കുമെന്ന് ഫ്ലിപ്കാർട്ട് ഗ്രൂപ്പ് സിഇഒ കല്യാൺ കൃഷ്ണമൂർത്തി അറിയിച്ചു.
ആദ്യഘട്ടത്തിൽ പരിമിത പ്രദേശങ്ങളിലായിരിക്കും സേവനം ലഭ്യമാക്കുക. ഉപഭോക്താക്കളുടെ പ്രതികരണം വിലയിരുത്തി ആവശ്യമായ മാറ്റങ്ങൾ വരുത്തിയ ശേഷമാകും കൂടുതൽ നഗരങ്ങളിലേക്ക് സേവനം വ്യാപിപ്പിക്കുക.
പുതിയ സേവനത്തിന് ഇതുവരെ പേരിട്ടിട്ടില്ല. എന്നാൽ പ്രത്യേക മൊബൈൽ ആപ്പിലൂടെയും നിലവിലുള്ള ഫ്ലിപ്കാർട്ട് ആപ്പിലൂടെയും ഉപഭോക്താക്കൾക്ക് സേവനം ലഭ്യമാകുമെന്ന് കമ്പനി അറിയിച്ചു. സർക്കാർ പിന്തുണയുള്ള ഓപ്പൺ നെറ്റ്വർക്ക് ഫോർ ഡിജിറ്റൽ കൊമേഴ്സ് (ONDC) പ്ലാറ്റ്ഫോമുമായും സേവനം സംയോജിപ്പിക്കാനാണ് ഫ്ലിപ്കാർട്ടിന്റെ പദ്ധതി. ഇതിലൂടെ കൂടുതൽ റെസ്റ്റോറന്റുകളെയും ഡെലിവറി പങ്കാളികളെയും ഉൾപ്പെടുത്താൻ കമ്പനിക്ക് സാധിക്കും.
അടുത്തിടെ ഫ്ലിപ്കാർട്ട് അതിന്റെ ക്വിക്ക് കൊമേഴ്സ് സേവനമായ ഫ്ലിപ്കാർട്ട് മിനിറ്റ്സ് 130 നഗരങ്ങളിലായി 1,000-ലധികം മൈക്രോ ഫുൾഫിൽമെന്റ് കേന്ദ്രങ്ങളിലേക്ക് വ്യാപിപ്പിച്ചതായി പ്രഖ്യാപിച്ചിരുന്നു. ടയർ-2, ടയർ-3 നഗരങ്ങളിൽ നിന്നുള്ള ആവശ്യകത കഴിഞ്ഞ വർഷത്തേക്കാൾ 42 മടങ്ങ് വർധിച്ചതായും, ഉപഭോക്താക്കളിൽ 40 ശതമാനത്തിലധികവും ജനറേഷൻ Z വിഭാഗത്തിൽപ്പെട്ടവരാണെന്നും കമ്പനി വ്യക്തമാക്കിയിട്ടുണ്ട്.
ഇതിനിടെ ഓൺലൈൻ ഭക്ഷ്യവിതരണ രംഗത്ത് മത്സരം ശക്തമാകുകയാണ്. റൈഡ്-ഹെയിലിംഗ് കമ്പനിയായ റാപ്പിഡോ അടുത്തിടെ Ownly എന്ന പേരിൽ ഭക്ഷ്യവിതരണ സേവനം അവതരിപ്പിച്ചിരുന്നു. റെസ്റ്റോറന്റുകളിൽ നിന്ന് കമ്മീഷൻ ഈടാക്കാതെയും ഓഫ്ലൈൻ വിലയ്ക്ക് സമാനമായ നിരക്കിൽ ഭക്ഷണം ലഭ്യമാക്കുമെന്നും കമ്പനി അവകാശപ്പെടുന്നു. സ്വിഗ്ഗിയും വിലക്കുറവ് ലക്ഷ്യമിട്ടുള്ള Toing എന്ന പുതിയ സേവനം ആരംഭിച്ചിട്ടുണ്ട്.
അതേസമയം, സൊമാറ്റോയുടെ മാതൃകമ്പനിയായ Eternal-ന്റെ സ്ഥാപകൻ ദീപീന്ദർ ഗോയൽ, പുതിയ മത്സരാർത്ഥികൾ പ്രധാനമായും വിലക്കിഴിവുകളെയാണ് ആശ്രയിക്കുന്നതെന്നും, ഭക്ഷ്യവിതരണ രംഗത്തിന്റെ അടുത്ത വളർച്ച വിതരണ ശൃംഖലയിലെ മെച്ചപ്പെടുത്തലുകളിലൂടെയായിരിക്കുമെന്നും അഭിപ്രായപ്പെട്ടു.
ഫ്ലിപ്കാർട്ട് എതിരാളികളെ എങ്ങനെ നേരിടുമെന്ന കാര്യത്തിൽ കല്യാൺ കൃഷ്ണമൂർത്തി വിശദീകരണം നൽകിയില്ല. ഉപഭോക്താക്കൾക്ക് പുതിയ മൂല്യം നൽകാൻ കഴിയുന്ന മേഖലകളിൽ മാത്രമാണ് കമ്പനി പ്രവേശിക്കുന്നതെന്നാണ് അദ്ദേഹം വ്യക്തമാക്കിയത്.
