നെയ്യാർ–പേപ്പാറ മേഖലകൾ പരിഗണനയിൽ;നഗരഹൃദയത്തിലെ മൃഗശാല കാടിനോട് ചേർന്ന മേഖലയിലേക്ക് മാറ്റണമെന്ന് മുഖ്യമന്ത്രി വി.ഡി. സതീശൻ; നിലവിലെ 30 ഏക്കർ ഭൂമി വലിയ പൊതുസ്ഥലമാക്കാനും നിർദേശം
തിരുവനന്തപുരം: നഗരഹൃദയത്തിൽ പ്രവർത്തിക്കുന്ന തിരുവനന്തപുരം മൃഗശാല മറ്റൊരു സ്ഥലത്തേക്ക് മാറ്റുന്നതിനെക്കുറിച്ച് സർക്കാർ തലത്തിൽ ആലോചന ശക്തമാകുന്നു. മൃഗശാലയെ നെയ്യാർ പോലെയുള്ള വനമേഖലയോട് ചേർന്ന പ്രദേശത്തേക്ക് മാറ്റി ആധുനിക അന്താരാഷ്ട്ര നിലവാരത്തിലുള്ള സുവോളജിക്കൽ പാർക്കായി വികസിപ്പിക്കണമെന്ന ആശയമാണ് മുഖ്യമന്ത്രി വി.ഡി. സതീശൻ മുന്നോട്ടുവച്ചത്.
സെപ്റ്റംബർ 16ന് സംസ്ഥാന സർക്കാർ സംഘടിപ്പിച്ച ‘Reimagining Kerala’ പരിപാടിയുടെ ഉദ്ഘാടന വേദിയിലായിരുന്നു മുഖ്യമന്ത്രിയുടെ നിർദേശം. നഗരത്തിനുള്ളിൽ വന്യമൃഗങ്ങളെ പരിപാലിക്കുന്നത് അവയുടെ സ്വാഭാവിക ആവാസവ്യവസ്ഥയുമായി പൊരുത്തപ്പെടുന്നില്ലെന്നും മൃഗങ്ങൾക്ക് കൂടുതൽ പ്രകൃതിസൗഹൃദമായ അന്തരീക്ഷം ഒരുക്കേണ്ടതുണ്ടെന്നും സതീശൻ അഭിപ്രായപ്പെട്ടു. നെയ്യാർ പോലെയോ സമാനമായ വനമേഖലയോട് ചേർന്നോ പുതിയ മൃഗശാല സ്ഥാപിക്കാമെന്നായിരുന്നു നിർദേശം.
തിരുവനന്തപുരം മൃഗശാലയുടെ നിലവിലെ സ്ഥാനം അനുയോജ്യമാണോ എന്ന് പുനഃപരിശോധിക്കണമെന്നാണ് മുഖ്യമന്ത്രി വ്യക്തമാക്കിയത്. പുതിയ സ്ഥലത്ത് മൃഗങ്ങളുടെ സ്വാഭാവിക ആവാസവ്യവസ്ഥയോട് ചേർന്ന രീതിയിൽ കൂടുതൽ വിശാലമായ സൗകര്യങ്ങളോടെ മൃഗശാല വികസിപ്പിക്കണമെന്ന ആശയവും അദ്ദേഹം മുന്നോട്ടുവച്ചു.
മൃഗശാല മാറ്റുന്നത് തന്റെ ‘സ്വപ്നപദ്ധതി’യാണെന്നും മുഖ്യമന്ത്രി പറഞ്ഞു. എന്നാൽ ഇത് നിലവിലെ ബജറ്റിൽ ഉൾപ്പെടുത്തിയ പദ്ധതിയല്ലെന്നും ദീർഘകാല തലസ്ഥാന വികസനത്തിന്റെ ഭാഗമായി ആശയം പരിഗണിക്കാമെന്നും അദ്ദേഹം വ്യക്തമാക്കി.
തിരുവനന്തപുരം മൃഗശാല ഇന്ത്യയിലെ ഏറ്റവും പഴക്കംചെന്ന മൃഗശാലകളിലൊന്നാണ്. കേരള സർക്കാരിന്റെ മ്യൂസിയംസ് ആൻഡ് സൂസ് വകുപ്പിന്റെ ഔദ്യോഗിക രേഖകൾ പ്രകാരം മ്യൂസിയം 1857 സെപ്റ്റംബറിൽ പൊതുജനങ്ങൾക്കായി തുറന്നശേഷം, കൂടുതൽ സന്ദർശകരെ ആകർഷിക്കുന്നതിനായി 1859ലാണ് മൃഗശാലയും പാർക്കും ആരംഭിച്ചത്. അതിനാൽ 2026ൽ മൃഗശാലയ്ക്ക് 167 വർഷം പൂർത്തിയാകുന്നു.
