ഹൈദരാബാദ്: ബ്രിട്ടീഷ് രാജകുടുംബത്തിലെ ഏറ്റവും ജനപ്രിയ വ്യക്തിത്വങ്ങളിലൊരാളായിരുന്ന ഡയാന രാജകുമാരിയുടെയും ഹൈദരാബാദുകാരിയായ അവന്തി റെഡ്ഡിയുടെയും അപൂർവമായ കൂടിക്കാഴ്ചയുടെ ചിത്രം വീണ്ടും ശ്രദ്ധ നേടുന്നു. ഡയാനയുടെ 29-ാം ചരമവാർഷികത്തിന്റെ പശ്ചാത്തലത്തിലാണ് വർഷങ്ങൾക്കുമുമ്പുള്ള ചിത്രം സമൂഹമാധ്യമങ്ങളിൽ വീണ്ടും പ്രചരിക്കുന്നത്.
പരമ്പരാഗത ലംബാഡി നൃത്തവേഷത്തിൽ, മുഖത്ത് ചായം പൂശി, നഗ്നപാദയായി ഡയാനയുടെ മടിയിലിരിക്കുന്ന നാലുവയസ്സുകാരി അവന്തിയുടെ ചിത്രമാണ് ഏറെ ശ്രദ്ധേയമായത്. ഡയാനയുടെ ഇന്ത്യാ സന്ദർശനത്തിനിടെ നടന്ന ഈ കൂടിക്കാഴ്ച രാജകീയ പ്രോട്ടോക്കോളുകൾക്കപ്പുറം മനുഷ്യസ്നേഹത്തിന്റെ ഉദാഹരണമായി പിന്നീട് മാറുകയായിരുന്നു.
പ്രണയദിനത്തിൽ ഹൈദരാബാദിലെത്തിയ ഡയാന
1992 ഫെബ്രുവരി 14നാണ് ബ്രിട്ടീഷ് രാജകുടുംബത്തിന്റെ ഇന്ത്യാ സന്ദർശനത്തിന്റെ ഭാഗമായി ഡയാന രാജകുമാരി ഹൈദരാബാദിലെ ലാലാപ്പേട്ട് ഗവൺമെന്റ് ഹൈസ്കൂളിലെത്തിയത്. സന്ദർശനത്തിന്റെ ഭാഗമായി വിദ്യാർഥികൾ അവതരിപ്പിച്ച പരമ്പരാഗത ലംബാഡി നൃത്തസംഘത്തിലുണ്ടായിരുന്ന ഏറ്റവും പ്രായം കുറഞ്ഞ കുട്ടിയായിരുന്നു അവന്തി റെഡ്ഡി.
പ്രശസ്ത നൃത്താധ്യാപിക ജപമാല റാണിയുടെ മകളായ അവന്തിയുടെ നൃത്തത്തിലെ കുട്ടിത്തവും നിഷ്കളങ്കതയും ഡയാനയുടെ ശ്രദ്ധ പിടിച്ചുപറ്റി. നൃത്തപരിപാടിക്ക് ശേഷം അവന്തി നിലത്തിരിക്കുമ്പോൾ ഡയാന സ്വയം അവളുടെ അടുത്തേക്ക് എത്തുകയായിരുന്നു. തുടർന്ന് കുട്ടിയെ വാരിയെടുത്ത് മടിയിലിരുത്തിയ ഡയാന, സന്ദർശനം പൂർത്തിയാകുന്നതുവരെ അവളെ ഒപ്പം നിർത്തുകയായിരുന്നു.
‘ഇന്ന് മുതൽ നീ എന്റെ മകൾ’
അവന്തിക്ക് നേരിയ ജലദോഷമുണ്ടായിരുന്നതും ഡയാന ശ്രദ്ധിച്ചു. കൈയിലുണ്ടായിരുന്ന തൂവാല ഉപയോഗിച്ച് കുട്ടിയുടെ മൂക്ക് തുടച്ചുനൽകിയതായാണ് സംഭവത്തിന് സാക്ഷികളായിരുന്നവർ പിന്നീട് ഓർത്തെടുത്തത്.
സുരക്ഷാ ഉദ്യോഗസ്ഥർ കുട്ടിയെ മാറ്റാൻ ശ്രമിച്ചെങ്കിലും ഡയാന അതിന് തയ്യാറായില്ലെന്നാണ് അന്നത്തെ സ്കൂൾ വിദ്യാഭ്യാസ ഡയറക്ടറായിരുന്ന പ്രണോതി സുഹാസിനി കാവൂരി പിന്നീട് പറഞ്ഞത്. ‘എനിക്ക് പെൺമക്കളില്ല, അതുകൊണ്ട് ഇന്ന് മുതൽ നീയാണ് എന്റെ മകൾ’ എന്നായിരുന്നു ഡയാന അവന്തിയോട് പറഞ്ഞതായുള്ള ഓർമ.
രാജകീയ പദവിയുടെയും സുരക്ഷാ പ്രോട്ടോക്കോളുകളുടെയും അതിരുകൾക്കപ്പുറം ഒരു സാധാരണ അമ്മയുടെ വാത്സല്യത്തോടെ ഒരു കുഞ്ഞിനോട് പെരുമാറിയ ഡയാനയുടെ ഈ സമീപനം അന്നുതന്നെ പലരുടെയും ശ്രദ്ധ നേടിയിരുന്നു.
കത്തുകളിലൂടെ തുടർന്ന ബന്ധം
ഇന്ത്യൻ സന്ദർശനം പൂർത്തിയാക്കി ബ്രിട്ടനിലേക്ക് മടങ്ങിയ ശേഷവും ഡയാന അവന്തിയെ മറന്നില്ലെന്നാണ് റിപ്പോർട്ടുകൾ. പിന്നീട് കത്തുകളിലൂടെ ഇരുവരും ബന്ധം നിലനിർത്തി. സ്വന്തം ഒപ്പോടുകൂടിയ ഒരു ചിത്രം ഡയാന അവന്തിക്ക് സമ്മാനമായി അയച്ചുനൽകുകയും ചെയ്തു.
വളർന്നുവരുന്നതിനിടെ ഡയാനയുടെ ജീവിതത്തെക്കുറിച്ച് അവന്തി കൂടുതൽ മനസ്സിലാക്കി. ഡയാനയെ തന്റെ റോൾ മോഡലായി കാണുകയും അവരുടെ വസ്ത്രധാരണത്തിലും ഹെയർസ്റ്റൈലിലും വരെ പ്രചോദനം കണ്ടെത്തുകയും ചെയ്തു.
നടക്കാതെപോയ ഒരു കൂടിക്കാഴ്ച
1997ൽ അവന്തി തന്റെ നൃത്തസംഘത്തോടൊപ്പം യൂറോപ്പ് പര്യടനത്തിനായി പോയിരുന്നു. ഇതിനിടെ ലണ്ടനിൽ ഡയാനയെ വീണ്ടും നേരിൽ കാണുന്നതിനുള്ള പദ്ധതിയും കുടുംബം ആലോചിച്ചിരുന്നു. എന്നാൽ ആ കൂടിക്കാഴ്ചയ്ക്ക് ദിവസങ്ങൾ മാത്രം ശേഷിക്കെ ഡയാനയുടെ ജീവിതത്തെ മാറ്റിമറിച്ച ദുരന്തമുണ്ടായി.
1997 ഓഗസ്റ്റിൽ പാരീസിലുണ്ടായ വാഹനാപകടത്തിലാണ് ഡയാന രാജകുമാരി മരിച്ചത്. അന്ന് ബെൽജിയത്തിൽ നൃത്തപരിപാടികളിൽ പങ്കെടുക്കുകയായിരുന്നു പത്തുവയസ്സുകാരിയായ അവന്തി.
ഡയാനയുടെ മരണവാർത്ത അറിഞ്ഞപ്പോഴും താനും സംഘവും നൃത്തപരിപാടികളിൽ പങ്കെടുക്കുകയായിരുന്നുവെന്ന് അവന്തി പിന്നീട് ഓർത്തെടുത്തിട്ടുണ്ട്. ഏറെ പ്രതീക്ഷയോടെ കാത്തിരുന്ന ആ കൂടിക്കാഴ്ച പിന്നീട് ഒരിക്കലും നടക്കാത്ത സ്വപ്നമായി മാറി.
ഇന്നും സൂക്ഷിക്കുന്ന അമൂല്യ സമ്മാനം
ഇന്ന് 36കാരിയായ അവന്തി റെഡ്ഡി ഹൈദരാബാദിൽ പ്രൈമറി സ്കൂൾ അധ്യാപികയായും നർത്തകിയായും ജീവിതം മുന്നോട്ടുകൊണ്ടുപോകുന്നു. ഡയാന ഒപ്പിട്ടുനൽകിയ ചിത്രം ഇന്നും അവന്തിയുടെ വീട്ടിലെ ഏറ്റവും വിലപ്പെട്ട ഓർമകളിലൊന്നായി സൂക്ഷിച്ചിരിക്കുകയാണ്.
കുട്ടിയായിരുന്നപ്പോൾ ആ കൂടിക്കാഴ്ചയുടെ പ്രാധാന്യം പൂർണമായി മനസ്സിലാക്കാൻ കഴിഞ്ഞിരുന്നില്ലെന്നും വളർന്നശേഷമാണ് ഡയാന തനിക്കും ലോകത്തിനും എത്രമാത്രം പ്രിയപ്പെട്ട വ്യക്തിയായിരുന്നു എന്ന് തിരിച്ചറിഞ്ഞതെന്നും അവന്തി പിന്നീട് പറഞ്ഞിട്ടുണ്ട്.
കാലം മൂന്ന് പതിറ്റാണ്ടിലേറെ പിന്നിട്ടിട്ടും ഡയാനയുടെ മടിയിലിരിക്കുന്ന ആ കൊച്ചുകുട്ടിയുടെ ചിത്രം ഇന്നും ആളുകളുടെ മനസിൽ ഇടംപിടിക്കുന്നു. രാജകീയ പദവികൾക്കും പ്രോട്ടോക്കോളുകൾക്കും അപ്പുറം സാധാരണ മനുഷ്യരോടുള്ള കരുതലും സ്നേഹവും പ്രകടിപ്പിച്ച ‘ജനങ്ങളുടെ രാജകുമാരി’ എന്ന ഡയാനയുടെ പ്രതിച്ഛായയുടെ മറ്റൊരു ഓർമപ്പെടുത്തലായി മാറുകയാണ് അവന്തിയുടെ കഥ.
