ഇറാനെതിരെയുള്ള ആക്രമണം ഒൻപതാം ദിവസവും തുടർന്ന് അമേരിക്കൻ സൈന്യം. പുതിയതായി ഒരു അമേരിക്കൻ സൈനികൻ കൂടി കൊല്ലപ്പെട്ടതോടെ, സംഘർഷത്തിൽ ജീവൻ നഷ്ടപ്പെട്ട യുഎസ് സൈനികരുടെ എണ്ണം മൂന്നായി ഉയർന്നു. ഹോർമുസ് കടലിടുക്കിലൂടെയുള്ള കപ്പൽ ഗതാഗതത്തെക്കുറിച്ചുള്ള ആശങ്കകളും ശക്തമായിട്ടുണ്ട്.
ഹോർമുസ് കടലിടുക്കിലെ പ്രധാന പാതകളിൽ വാണിജ്യ കപ്പലുകളെ ആക്രമിക്കാനുള്ള ഇറാന്റെ ശേഷി ദുർബലപ്പെടുത്തുക എന്ന ലക്ഷ്യത്തോടെ “പുതിയൊരു ഘട്ട ആക്രമണം” ആരംഭിച്ചതായി യുഎസ് സെൻട്രൽ കമാൻഡ് (CENTCOM) അറിയിച്ചു.
അതേസമയം, തിങ്കളാഴ്ച പുലർച്ചെ നിരവധി ഇറാനിയൻ നഗരങ്ങളിൽ അമേരിക്കൻ മിസൈലുകൾ പതിച്ചതായി ഇറാന്റെ പ്രമുഖ വാർത്താ ഏജൻസിയായ തസ്നിം റിപ്പോർട്ട് ചെയ്തു. തബ്രിസ്, ചബഹാർ, കൊനാരാക്, ബന്ദർ മഹ്ഷഹർ, ബന്ദർ ഇമാം ഖൊമേനി തുടങ്ങിയ നഗരങ്ങളിൽ വൻ സ്ഫോടനശബ്ദം കേട്ടതായി പ്രാദേശിക മാധ്യമങ്ങൾ സ്ഥിരീകരിക്കുന്നു.
ഇറാന്റെ ആക്രമണ ഡ്രോണിന്റെ അവശിഷ്ടങ്ങൾ സുരക്ഷിതമായി നിർവീര്യമാക്കുന്നതിനിടയിലാണ് ശനിയാഴ്ച വടക്കൻ ഇറാഖിൽ യുഎസ് സൈനികൻ കൊല്ലപ്പെട്ടതെന്ന് യുഎസ് മിലിട്ടറി അറിയിച്ചു. മേഖലയിലെ സൈനിക താവളങ്ങളെയും യുഎസ് കേന്ദ്രങ്ങളെയും ലക്ഷ്യമിട്ട് വരും ദിവസങ്ങളിലും ആക്രമണം ശക്തമാക്കാനാണ് സാധ്യത.
