ദുബായ്: മേഖലയിലെ സുരക്ഷാ സംഘർഷങ്ങളുടെ പശ്ചാത്തലത്തിൽ ദുബായുടെ തീരപ്രദേശങ്ങളുടെ സുരക്ഷ ഉറപ്പാക്കാൻ ദുബായ് പൊലീസ് അത്യാധുനിക സാങ്കേതിക സംവിധാനങ്ങളും ഏകോപിത സുരക്ഷാ പ്രവർത്തനങ്ങളും ശക്തമാക്കിയതായി അധികൃതർ അറിയിച്ചു. എ.ഐ. അധിഷ്ഠിത മാരിടൈം ഓപ്പറേഷൻസ് സെന്ററിന്റെ നേതൃത്വത്തിൽ വിവിധ സർക്കാർ ഏജൻസികൾ, തുറമുഖ അധികൃതർ, സുരക്ഷാ വിഭാഗങ്ങൾ എന്നിവ സംയുക്തമായി പ്രവർത്തിച്ച് കടൽമാർഗങ്ങളിലെ നിരീക്ഷണവും അടിയന്തര പ്രതികരണവും കാര്യക്ഷമമാക്കുകയാണ്.
സമീപകാലത്ത് മേഖലയിലെ സംഘർഷസാഹചര്യങ്ങൾ വർധിച്ചതിനെ തുടർന്ന് സമുദ്രമാർഗങ്ങളിലൂടെയുള്ള സുരക്ഷാ വെല്ലുവിളികൾ മുൻനിർത്തിയാണ് ഈ സംവിധാനത്തിന് കൂടുതൽ പ്രാധാന്യം നൽകുന്നതെന്ന് അധികൃതർ വ്യക്തമാക്കി. തീരദേശ ഗതാഗതം, വിനോദസഞ്ചാര പ്രവർത്തനങ്ങൾ, വ്യാപാര കപ്പൽഗതാഗതം എന്നിവ തടസ്സമില്ലാതെ തുടരുന്നതിനൊപ്പം സുരക്ഷയും ഉറപ്പാക്കുകയെന്നതാണ് പ്രധാന ലക്ഷ്യം.
സ്മാർട്ട് പൊലീസിംഗ്, ഡിജിറ്റൽ നിരീക്ഷണ സാങ്കേതികവിദ്യകൾ, AI അധിഷ്ഠിത സുരക്ഷാ സംവിധാനങ്ങൾ എന്നിവയുടെ വ്യാപക ഉപയോഗത്തിലൂടെ ദുബായെ ലോകത്തിലെ ഏറ്റവും സുരക്ഷിത നഗരങ്ങളിലൊന്നായി നിലനിർത്താനുള്ള ശ്രമങ്ങളുടെ ഭാഗമായാണ് ഈ തീരസുരക്ഷാ നവീകരണമെന്ന് ദുബായ് പൊലീസ് അറിയിച്ചു.
