സോഷ്യൽ മീഡിയ പ്ലാറ്റ്‌ഫോമുകൾക്കുള്ള ‘സേഫ് ഹാർബർ’ പരിരക്ഷ

Jishnu Menon
2 Min Read

സോഷ്യൽ മീഡിയ പ്ലാറ്റ്‌ഫോമുകളായ ഫേസ്ബുക്ക്, ഇൻസ്റ്റഗ്രാം, എക്‌സ് (ട്വിറ്റർ), യൂട്യൂബ്, വാട്‌സ്ആപ്പ് തുടങ്ങിയവ ഇന്ന് കോടിക്കണക്കിന് ആളുകളുടെ ആശയവിനിമയത്തിന്റെയും വാർത്താവിനിമയത്തിന്റെയും പ്രധാന വേദികളാണ്. എന്നാൽ ഇത്തരം പ്ലാറ്റ്‌ഫോമുകളിലൂടെ പ്രചരിക്കുന്ന വ്യാജവാർത്തകൾ, വിദ്വേഷപ്രചാരണങ്ങൾ, അപകീർത്തികരമായ ഉള്ളടക്കങ്ങൾ, സ്വകാര്യത ലംഘിക്കുന്ന വിവരങ്ങൾ, നിയമവിരുദ്ധമായ പോസ്റ്റുകൾ എന്നിവയുടെ ഉത്തരവാദിത്തം ആർക്കാണ്?

ഉള്ളടക്കം പ്രസിദ്ധീകരിക്കുന്ന വ്യക്തിക്കോ, അത് മറ്റുള്ളവരിലേക്ക് എത്തിക്കുന്ന പ്ലാറ്റ്‌ഫോമിനോ?

ഈ ചോദ്യത്തിനുള്ള നിയമപരമായ പ്രധാന ഉത്തരങ്ങളിലൊന്നാണ് ‘സേഫ് ഹാർബർ’ (Safe Harbour) പരിരക്ഷ. ഇന്റർനെറ്റ് പ്ലാറ്റ്‌ഫോമുകൾക്ക് ചില നിബന്ധനകൾക്ക് വിധേയമായി നിയമപരമായ സംരക്ഷണം നൽകുന്ന സംവിധാനമാണിത്. എന്നാൽ ഡിജിറ്റൽ ലോകത്ത് ഉത്തരവാദിത്തവും നിയന്ത്രണവും ഉറപ്പാക്കണമെന്ന സർക്കാരിന്റെ നിലപാടിനെത്തുടർന്ന് ഈ പരിരക്ഷ വീണ്ടും ചർച്ചാവിഷയമാകുകയാണ്.

Ref.No:DPCI-PKD-50

സേഫ് ഹാർബർ എന്നത് ഇന്റർനെറ്റ് ഇടനിലക്കാർക്ക് (Internet Intermediaries) ഉപയോക്താക്കൾ സൃഷ്ടിക്കുകയും പങ്കുവെക്കുകയും ചെയ്യുന്ന ഉള്ളടക്കത്തിന്റെ പേരിൽ സ്വമേധയാ നിയമബാധ്യത ചുമത്തപ്പെടുന്നതിൽനിന്ന് നിശ്ചിത സാഹചര്യങ്ങളിൽ സംരക്ഷണം നൽകുന്ന നിയമപരമായ സംവിധാനമാണ്.

ഉദാഹരണത്തിന്:

  • ഒരാൾ ഫേസ്ബുക്കിൽ മറ്റൊരാളെ അപകീർത്തിപ്പെടുത്തുന്ന പോസ്റ്റ് പ്രസിദ്ധീകരിക്കുന്നു.

  • മറ്റൊരാൾ യൂട്യൂബിൽ തെറ്റായ വിവരങ്ങളടങ്ങിയ വീഡിയോ അപ്‌ലോഡ് ചെയ്യുന്നു.

  • ഒരു വ്യക്തി എക്‌സിലൂടെ വ്യാജവാർത്ത പ്രചരിപ്പിക്കുന്നു.

ഇത്തരം ഉള്ളടക്കങ്ങൾ സൃഷ്ടിച്ച വ്യക്തിയാണ് സാധാരണയായി അതിന്റെ പ്രാഥമിക ഉത്തരവാദി. പ്ലാറ്റ്‌ഫോം വെറും ഇടനിലക്കാരനായി പ്രവർത്തിക്കുകയും നിയമം അനുശാസിക്കുന്ന നിബന്ധനകൾ പാലിക്കുകയും ചെയ്യുന്നുവെങ്കിൽ, ആ ഉള്ളടക്കത്തിന്റെ പേരിൽ പ്ലാറ്റ്‌ഫോമിന് നിയമപരമായ സംരക്ഷണം ലഭിക്കാം. ഇന്ത്യയിലെ വിവരസാങ്കേതിക നിയമം, 2000 (Information Technology Act, 2000) ലെ സെക്ഷൻ 79 ആണ് സേഫ് ഹാർബർ പരിരക്ഷയുടെ പ്രധാന നിയമാടിസ്ഥാനം.

സേഫ് ഹാർബർ ചർച്ചയിലെ ഏറ്റവും പ്രധാനപ്പെട്ട വിഷയങ്ങളിലൊന്നാണ് അൽഗോരിതം (Algorithm).

സോഷ്യൽ മീഡിയയിൽ ഉപയോക്താക്കൾ പോസ്റ്റ് ചെയ്യുന്ന എല്ലാ വിവരങ്ങളും ഒരേ രീതിയിൽ എല്ലാവരിലേക്കും എത്തുന്നില്ല. ഓരോ ഉപയോക്താവിനും എന്ത് കാണിക്കണം എന്ന് തീരുമാനിക്കുന്നതിൽ പ്ലാറ്റ്‌ഫോമുകളുടെ അൽഗോരിതങ്ങൾക്ക് വലിയ പങ്കുണ്ട്.

സേഫ് ഹാർബർ പുനഃപരിശോധനയ്ക്ക് പിന്നിലെ പ്രധാന കാരണങ്ങളിൽ ഒന്നാണ് ഡിജിറ്റൽ ലോകത്ത് വർധിച്ചുവരുന്ന ദുരുപയോഗങ്ങൾ. പ്രത്യേകിച്ച് ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യയുടെ സഹായത്തോടെ സൃഷ്ടിക്കുന്ന വ്യാജ ചിത്രങ്ങൾ, വീഡിയോകൾ, ശബ്ദരേഖകൾ എന്നിവ വലിയ വെല്ലുവിളിയാണ്.

ഇന്ത്യയിൽ സേഫ് ഹാർബർ സംരക്ഷണവുമായി ബന്ധപ്പെട്ട് മറ്റൊരു പ്രധാന നിയമസംവിധാനമാണ് Information Technology (Intermediary Guidelines and Digital Media Ethics Code) Rules, 2021. 2021 ഫെബ്രുവരി 25-നാണ് കേന്ദ്രസർക്കാർ ഈ ചട്ടങ്ങൾ വിജ്ഞാപനം ചെയ്തത്. പിന്നീട് 2022, 2023 വർഷങ്ങളിൽ ഭേദഗതികളും വരുത്തി. ഈ ചട്ടങ്ങൾ പ്രകാരം സോഷ്യൽ മീഡിയ കമ്പനികൾക്ക് നിരവധി ഉത്തരവാദിത്തങ്ങളുണ്ട്.

Share This Article
Leave a Comment

Leave a Reply

Your email address will not be published. Required fields are marked *

×