ചർച്ച വിജയം; സ്വകാര്യ ബസ് സമരം ഒഴിവാക്കി

Zaid Ebrahim Anwari
1 Min Read

പാലക്കാട്: സംസ്ഥാനത്ത് ഇന്ന് നടത്താനിരുന്ന സ്വകാര്യ ബസ് സമരം പിൻവലിച്ചു. ഗതാഗത മന്ത്രി സി.പി. ജോണുമായി ബസ് ഉടമകളുടെ സംയുക്ത സമരസമിതി നടത്തിയ ചർച്ചയെ തുടർന്നാണ് തീരുമാനം. ഇതോടെ നവംബർ 3 മുതൽ അനിശ്ചിതകാലത്തേക്ക് സർവീസ് നിർത്തിവെക്കുമെന്ന പ്രഖ്യാപനത്തിൽ നിന്ന് ബസ് ഉടമകൾ പിന്മാറി.സമരപ്രഖ്യാപനത്തെ തുടർന്ന് ആശങ്കയിലായിരുന്ന യാത്രക്കാർക്ക് തീരുമാനം ആശ്വാസമായി.

Ref.No:ZE-515-024-50

സ്വകാര്യ ബസ് മേഖലയിലെ സാമ്പത്തിക പ്രതിസന്ധി പരിഹരിക്കുക,   കെ.എസ്.ആർ.ടി.സിയുടെ പ്രിയദർശിനി സർവീസുമായി ബന്ധപ്പെട്ട ആശങ്കകൾ പരിഗണിക്കുക തുടങ്ങിയ ആവശ്യങ്ങളുന്നയിച്ചായിരുന്നു സമരപ്രഖ്യാപനം. മന്ത്രിയുമായി നടത്തിയ ചർച്ചയിൽ സ്വകാര്യ ബസ് മേഖലയിലെ പ്രതിസന്ധികൾ പരിഹരിക്കുന്നതിനുള്ള ചില നിർദേശങ്ങളിൽ ധാരണയായതായാണ് വിവരം.

സ്വകാര്യ ബസുകൾ സർക്കാർ ലീസിനെടുക്കുന്നതും സമയക്രമം കാലാനുസൃതമായി പരിഷ്കരിക്കുന്നതും ഉൾപ്പെടെയുള്ള കാര്യങ്ങളിൽ ചർച്ചയിൽ ധാരണയായിട്ടുണ്ട്. സ്വകാര്യ ബസ് ഉടമകൾ ഉന്നയിച്ച ആവശ്യങ്ങളിൽ തുടർനടപടികൾ സ്വീകരിക്കുന്നതുമായി ബന്ധപ്പെട്ടും ചർച്ചകൾ നടന്നതായാണ് സൂചന. എന്നാൽ യാത്രാനിരക്ക് വർധന, വിദ്യാർഥികളുടെ യാത്രാ കൺസഷൻ നിരക്ക് എന്നിവയിൽ അന്തിമ തീരുമാനമായിട്ടില്ല.

ബസ് ഉടമകൾ ഉന്നയിച്ച എല്ലാ ആവശ്യങ്ങൾക്കും പൂർണ പരിഹാരമായിട്ടില്ലെങ്കിലും സമരം തൽക്കാലം ഒഴിവാക്കാൻ ധാരണയായത് ശ്രദ്ധേയമാണ്. സമരം പ്രഖ്യാപിച്ചതോടെ നവംബർ 3 മുതൽ സ്വകാര്യ ബസ് സർവീസുകൾ നിലയ്ക്കുമെന്ന ആശങ്കയിലായിരുന്നു സാധാരണ യാത്രക്കാരും വിദ്യാർഥികളും.

സമരം പിൻവലിച്ചതോടെ സംസ്ഥാനത്തുടനീളം സ്വകാര്യ ബസ് സർവീസുകൾ പതിവുപോലെ തുടരാനാകും. മന്ത്രിയുമായുള്ള ചർച്ചയിൽ ഉണ്ടായ ധാരണകൾ തുടർനടപടികളിലൂടെ നടപ്പിലാകുമോയെന്നും യാത്രാനിരക്ക്, വിദ്യാർഥികളുടെ കൺസഷൻ തുടങ്ങിയ വിഷയങ്ങളിൽ സർക്കാർ എന്ത് നിലപാട് സ്വീകരിക്കുമെന്നുമാണ് ഇനി അറിയാനുള്ളത്.

Share This Article
Leave a Comment

Leave a Reply

Your email address will not be published. Required fields are marked *

×