ആക്രമണം ഒന്നിന് നേരെയെങ്കിൽ മൂന്ന് രാജ്യങ്ങൾക്ക് നേരെയും എന്ന് പ്രഖ്യാപനം; ‘മക്ക സംയുക്ത പ്രതിരോധ കരാർ’ നിലവിൽ വന്നു.
ഇസ്ലാമാബാദ് / മക്ക:പശ്ചിമേഷ്യയിൽ യുദ്ധസമാനമായ സുരക്ഷാ പ്രതിസന്ധി രൂക്ഷമായി തുടരുന്നതിനിടെ, സൗദി അറേബ്യ, പാകിസ്താൻ, തുർക്കി എന്നീ രാജ്യങ്ങൾ ചരിത്രപരമായ സംയുക്ത പ്രതിരോധ കരാറിൽ ഒപ്പുവെച്ചു. ‘മക്ക സംയുക്ത പ്രതിരോധ കരാർ’ (Mecca Joint Defence Agreement) എന്നറിയപ്പെടുന്ന ഈ ഉടമ്പടിയിലൂടെ മൂന്ന് രാജ്യങ്ങളും കൂട്ടായ പ്രതിരോധത്തിനും (Collective Defence) സുരക്ഷാ തടയിടലിനും (Collective Deterrence) പരസ്പരം പ്രതിജ്ഞാബദ്ധരായി.
സൗദി അറേബ്യയിലെ മക്കയിൽ നടന്ന അൽ-സഫ കൊട്ടാരത്തിലെ ഉച്ചകോടിയിലാണ് നിർണായക കരാർ ഒപ്പുവെച്ചത്. സൗദി കിരീടാവകാശിയും പ്രധാനമന്ത്രിയുമായ മുഹമ്മദ് ബിൻ സൽമാൻ, തുർക്കി പ്രസിഡന്റ് റജബ് തയ്യിപ് എർദോഗൻ, പാകിസ്താൻ പ്രധാനമന്ത്രി ഷെഹ്ബാസ് ഷെരീഫ് എന്നിവരാണ് ഉച്ചകോടിക്ക് നേതൃത്വം നൽകിയതും കരാറിൽ ഒപ്പുവെച്ചതും.
യെമനിലെ ഹൂതി വിഭാഗത്തിൽ നിന്നും ഇറാന്റെ ഭാഗത്തുനിന്നും തുടർച്ചയായ ആക്രമണ ഭീഷണികൾ നേരിടുന്ന പശ്ചാത്തലത്തിലാണ് സൗദി അറേബ്യ ഈ സഖ്യം രൂപീകരിക്കാൻ മുൻകൈയെടുത്തത്. എന്നാൽ, ഈ കരാർ പ്രത്യേകമായി ഏതെങ്കിലും ഒരു രാജ്യത്തെ ലക്ഷ്യം വെച്ചുള്ളതല്ലെന്നും മേഖലയിൽ സമാധാനവും സ്ഥിരതയും ഉറപ്പാക്കാനുള്ള പ്രതിരോധ പങ്കാളിത്തം മാത്രമാണെന്നും തുർക്കി സർക്കാർ വൃത്തങ്ങൾ വ്യക്തമാക്കി.

ആക്രമണം ഒരാൾക്കെതിരെയെങ്കിൽ മൂന്നുപേർക്കെതിരെ
കരാറിലെ ഏറ്റവും പ്രധാനപ്പെട്ട വ്യവസ്ഥ മൂന്ന് രാജ്യങ്ങളിൽ ഏതെങ്കിലും ഒന്നിനെതിരായ സായുധ ആക്രമണം മൂന്നുപേരെയും ലക്ഷ്യമിട്ടുള്ള ആക്രമണമായി കണക്കാക്കും എന്നതാണ്. ഇതോടെ ആക്രമണ സാധ്യതകൾക്കെതിരെ പരസ്പര പ്രതിരോധവും സംയുക്ത പ്രതിരോധ ശേഷിയും ശക്തിപ്പെടുത്തുകയാണ് ലക്ഷ്യം.
കരാറിന്റെ ഭാഗമായി പ്രതിരോധ സഹകരണം കൂടുതൽ ആഴത്തിലാക്കാനും സംയുക്ത പ്രതിരോധ ശേഷി വർധിപ്പിക്കാനും ഭീഷണികളെ നേരിടുന്നതിനുള്ള ഏകോപനം ശക്തമാക്കാനും ധാരണയായിട്ടുണ്ട്. എന്നാൽ കരാറിന്റെ പൂർണമായ പ്രവർത്തനപരമായ വ്യവസ്ഥകൾ പൊതുവിൽ ലഭ്യമല്ലാത്തതിനാൽ, ഒരു ആക്രമണം ഉണ്ടായാൽ സൈനികമായി എങ്ങനെ പ്രതികരിക്കുമെന്നതിന്റെ വിശദാംശങ്ങൾ ഇപ്പോഴും വ്യക്തമല്ല.
